A rôh hôp, Ngế pro xiâm hnê ngăn tơnêi têa kheăn kơdeăn mâu tơdroăng mơ-eăm, tơdroăng ki châ tơƀrê kal khât ki Đảng ƀô̆, Khu râ kăn pơkuâ ƀă Kuăn pơlê kong kân Cần Thơ châ tung pơla kố nah. Mơhé tiah mê, Ngế pro xiâm hnê ngăn tơnêi têa tối inhên kơlo tơtêk GRDP dêi pơlê kong kân ối má 31/34 kong pơlê; tơtêk dêi kơpong kơmăi kơmok – mơjiâng tá hâi mơhnhôk châ mâu kơvâ kơmăi kơmok uâ bro, xúa kŏng ngê̆ rơxông.

Ngế pro xiâm hnê ngăn tơnêi têa pơkâ thế Pơlê kong kân Cần Thơ pơhlêh troăng tơmiât ing lo pêi troăng pêi ki rơkê mơnhông tơtêk. Kal hbrâ pơkâ mâu troăng pơkâ pêi, troăng hơlâ ki phá tơ-ê vâ pơlê kong kân châ tơƀrê hluâ pơkâ xua ai hên tơmeăm ki ai hlâu, ki rơhêng vâ tối cho on tơhrik ki vêh pro, kơno têa kơxĭ ƀă tíu kơdrâm kuăn pơlê rêh ối pêi cheăng kâ. Tối rơdêi xiâm kối vâ mơnhông mơdêk, pôa Lê Minh Hưng, Ngế pro xiâm hnê ngăn tơnêi têa tối pơkâ pêi cho xiâm rêi vâ mơhnhôk mơ’no liăn cheăng ƀă mơnhông cheăng kâ – pơlê pơla.

Ngế pro xiâm hnê ngăn tơnêi têa pơkâ thế thâ séa ngăn, tơ’nôm pơkâ pêi dêi pơlê kong kân tiô pơkâ pêi tâi tâng tơnêi têa, pơkâ kơpong ƀă pơkâ pêi xúa tơnêi la ngiâ.