Pôa Lê Minh Khái, Ngế pro xiâm phŏ hnê ngăn nếo ai roh pêi cheăng ƀă khu kăn pơkuâ kong pơlê Tây Ninh ‘na pêi chiâk pêi deăng, mơdró kâ, mơ’no liăn mơjiâng tơmeăm tơdjuôm, mơjiâng hngêi trăng, troăng klông, ƀă mơ’no tê kế tơmeăm ăm kong têa ê. Xông tơpui a chôu phut pêi cheăng mê, pôa Lê Minh Khái hiăng mơnhên tro ‘ló khât ƀă kơdeăn khĕn mâu tơdroăng ki khu kăn pơkuâ cheăng kal kí dêi kong pơlê Tây Ninh hiăng châ chiâng pêi pro tơƀrê khât tung mâu khế hơnăm hdrối mê hía nah.

Pôa Lê Minh Khái pâ thế khu kăn pơkuâ hnê ngăn kong pơlê Tây Ninh pơtối mơnhên, seá tơtro khât mâu tơdoăng ki ai păng ‘nâng vâ tăng troăng hơlâ thăm mơdêk tơdroăng pêi cheăng kâ-rêh ối pơlê pơla pơtối mơnhông. Pôa Lê Minh Khái pơkâ thế tung la ngiâ kố ah, Tây Ninh kal athế hbrâ rơnáu hlê plĕng nhên tơdroăng, thăm mơdêk tơdroăng ki tối tơbleăng mâu tơdroăng ki ai tơdjâk, tơdroăng ki tơvâ tơvân, mơnhĕn troh kong pơlê kố.

Kal athế plĕng nhên tung tơdroăng tơrŭm môi tuăn vâ kơdroh tah, tơleăng mơnhên mâu hnoăng cheăng ki chiâng phep pêi pro; pêi pro châ tơƀrê khât ki tơƀrê, tơdrêng mâu hnoăng cheăng, po troăng hơlâ tung mơnhông mơdêk pêi cheăng kâ - rêh ối pơlê pơla. Pakĭng mê, Tây Ninh kal athế thăm mơdêk hơ’lêh kơvâ pêi cheăng kơmăi kơmok, po troăng hơlâ va tah lôi mâu tơdroăng xahpá vâ tơ’mot khu mơdró ‘no liăn cheăng, mơnhông tro tiô troăng hơlâ tơdjuôm ƀă vêh pêi pro tro tiô troăng hơlâ ki ó rơdêi dêi kong pơlê.