Kơxo lơ 24/4, pôa Lê Minh Khái, Ngế pro xiâm phŏ hnê ngăn tơnêi têa pơkuâ po rôh hôp ‘no tơdrêng ing troăng hyôh internet ƀă 5 kong pơlê mê cho Trà Vinh, Vĩnh Long, Sóc Trăng, An Giang ƀă Pơlê kong kân Hồ Chí Minh vâ tah lôi mâu tơdroăng xahpá tung ăm mung liăn ngân ƀă mơ’no liăn mơjiâng pro tơmeăm khoăng tơdjuôm. Tiô tối tơbleăng, tâi tâng kơxô̆ liăn ‘no ăm 5 to kong pơlê kố troh tâi khế 3/2023 châ lối 2.556 rơtal liăn, châ 2,74% túa pơcháu iâ tâ tâng pơchông ƀă pơkâ tơdjuôm dêi lâp tơnêi têa. Krê Pơlê kong kân Hồ Chí Minh ‘no iâ tâ, bu châ 0,89%.

Tơpui a rôh hôp, pôa Lê Minh Khái, Ngế pro xiâm phŏ hnê ngăn tơnêi têa tối nhên: tơdroăng ki hrá ‘no liăn, ối rơlối hên kơxô̆ liăn Tơnêi têa tơdjâk hên troh tơdroăng ki mơnhông ƀă kơxô̆ liăn dêi tơdroăng cheăng kâ, xua mê kal pêi pro nhên hnoăng cheăng pôu râng tung tơdroăng ki hrá ‘no liăn, hrá pơtroh troăng hơlâ ‘no liăn cheăng; Ngế pro xiâm phŏ hnê ngăn tơnêi têa pơkâ thế, mâu khu xiâm, kơvâ cheăng kong pơlê tơkŭm hnê mơhno kơtăng tơdâng tơ’mô, tơƀrê mâu hnoăng cheăng troăng hơlâ. Rơtế amê, athế đi đo séa ngăn, pơkâ séa ngăn tơrêm tơdroăng tơkêa vâ teăm tŏng kum mâu tơdroăng xơpá, tơvâ ki dế trâm tung tơdroăng ki ai khât.