VOV4.Xơ Đăng - Kơxê lơ 28/7, a Tíu pêi cheăng Chin phuh, pôa Lê Minh Khái, Ngế pro xiâm phŏ hnê ngăn tơnêi têa pơkuâ po Rôh hôp má môi Khu hnê mơhno cheăng ‘na tơbleăng pêi pro Tơdroăng ‘mâi mơnhông ƀă mơdêk cheăng kâ rêh ối pơlê pơla. Tiô hlá mơ-éa tối tơbleăng dêi Khu xiâm pơkâ ƀă ‘no liăn cheăng, klêi kơ’nâi 6 khế tơbleăng Tơdroăng pơkâ 11 dêi Chin phuh, mâu kơ koan hiăng pêi klêi mâu tơdroăng cheăng ki kân, pêi pro châ mâu tơdroăng ki rơhêng vâ ƀă tơdroăng ki pơkâ mơ’no.

‘Na klêi tơdroăng ki ‘no liăn, tiô riân apoăng, mâu troăng hơlâ ối tung tơdroăng hiăng ‘no dâng 48 rơpâu rơtal liăn. Tối nhên mâu troăng hơlâ tŏng kum a  Tơdroăng ‘mâi mơnhông ƀă mơdêk cheăng kâ rêh ối pơlê pơla dế châ tơbleăng kơtăng, ai mâu troăng hơlâ ai kơxô̆ liăn ‘no hên tung pơla iâ hơnăm, ai mâu tơdroăng hiăng châ hơ’lêh hên khât. Laga, ối ai mâu rơkong tơpui tối xuân tối nhên tơdroăng ki chêh pro mâu hlá mơ-éa hnê mơhno ối tá hâi châ rak vế tơniăn tơdroăng ki pơkâ thế a tơdroăng pơkâ kơxô̆ 11/NQ-CP.

Pơkâ thế, tung la ngiâ kal tối tơbleăng, mơdêk tơdroăng ki pêi pro hbrâ rơnáu, rĕng tŏng kum mâu tơdroăng ki xơpá, tơvâ tơvân, rak vế mơdêk tơƀrê tơdroăng pơkâ.

Katarina Nga tơplôu ƀă tơbleăng