Tiô tối tơbleăng dêi Khu xiâm ngăn ‘na liăn ngân, tâng riân 11 khế hơnăm 2022, CPI tâk 3,02% tâng pơchông ƀă hơnăm hdrối; liăn ôh tă ai yă vâ tối tâk 2,38%. CPI tâng riân hơnăm 2022 tâk 3,1- 3,2% tâng vâ pơchông ƀă hơnăm 2021, kơxô̆ liăn ôh tá kơnâ tung tơdroăng pơkâ dêi Kuô̆k hô̆i tơbleăng... Laga pakĭng mâu tơdroăng pêi châ tơƀrê tung tơdroăng rak ngăn, pơkuâ yă xuân ối ai mâu tơdroăng ki tơvâ tơvân, ki pá tung mơjiâng, pêi klêi luât pơkâ, luât pơkâ tŏng kum tung tơdroăng ‘na yă.

Pôa Lê Minh Khái, Ngế xiâm phŏ hnê ngăn tơnêi têa tối nhên, kal pơtối pơkâ troăng rơhlâ ki kal tung tơdroăng rak ngăn, pơkuâ yă hơnăm 2023 môi tiah:  Mơdêk tơdroăng rak ngăn, pơkuâ yă rôh Têt Lo hơnăm nếo Qúy Mão; pơkuâ yă mâu tơmeăm dêi tơnêi têa rak ngăn hbrâ rơnáu tung mâu khế apoăng vâ châ tơniăn ăm tơdroăng séa ngăn liăn ôh tá kơnâ yă tung plâ hơnăm; hbrâ  rơkê tung tơdroăng rak ngăn, pơkuâ yă tung lâp tơnêi hơnăm 2023.