Kơxê lơ 22/6, pôa Lê Minh Khái, Ngế pro xiâm phŏ hnê ngăn tơnêi têa hiăng tơdah pôa Choo Kyung-ho, Ngế pro xiâm phŏ xuân cho Ngế xiâm pơkuâ liăn ngân Hàn Quốc. Pôa Lê Minh Khái tối nhên: Chin phuh Việt Nam đi đo mơhnhôk mâu khu tê mơdró Hàn Quốc mơ’no liăn cheăng nếo ƀă po rơdâ kân tíu mơ’no liăn cheăng, ki má lối cho tung mâu kơvâ kơjo má môi, môi tiah mơjiâng pro hngêi trăng, troăng klông, mơjiâng pro tơmeăm khoăng điên tưh chal nếo, tơmeăm chiâng hrik mơ’no hyôh, tơmeăm ki kân, kŏng ngê̆ sinh hok, tíu kơdrâm kuăn pơlê rêh ối rơkê; tơtrŏng hnê kŏng ngê̆ ki xiâm.

Việt Nam kheăn kơdeăn tơdroăng Hàn Quốc pơtối ngăn Việt Nam cho “Khu tơrŭm cheăng ton xŏn” ‘na ODA ƀă mâu tơdroăng tơkêa bro tơrŭm mơnhông dêi Hàn Quốc mơjiâng tơdroăng mơnhông mơdêk cheăng kâ – rêh ối pơlê pơla a hên kơpong, kong pơlê tung lâp tơnêi têa. Ngế pro xiâm hnê ngăn tơnêi têa pơkâ thế, Hàn Quốc pơtối po rơdâ tâ nếo tơdroăng tŏng kum liăn ôh tá xo tơvêh ăm Việt Nam, ki má lối cho tung mâu kơvâ hriăn plĕng mơnhông mơdêk (R&D), hơ’lêh nếo tơmiât pêi rơkê ƀă hía hé; pói vâ pôa Choo Kyung-ho pơtối tơmâng, hnê mơhno mâu kơ koan Hàn Quốc tơrŭm ƀă mâu kơ koan Việt Nam vâ thăm pêi pro châ tơƀrê mâu tơdroăng roh hôp tơpui tơno roh má 2 tung la ngiâ.