Kơxo hâi lơ 25/6, a Hà Nội, kong pơlê Quảng Bình tơrŭm ƀă Khu xiâm Pơkâ ƀă ‘no liăn cheăng, Vi ƀan Pơlê kong kân Hà Nội tơkŭm po hneăng hôp tơbleăng pơkâ kong pơlê Quảng Bình ƀă ‘no liăn cheăng hơnăm 2023. Veăng hôp ai pôa Lê Minh Khái, Ngế pro xiâm phŏ hnê ngăn tơnêi têa, rơtế ƀă mâu khu xiâm, kơvâ cheăng ƀă kong pơlê ƀă krâm kuăn pơlê mâu khu ‘no liăn cheăng, khu tơrŭm cheăng, khu mơdró tung tơnêi têa ƀă kong têa ê.

Tơbleăng a hneăng hôp, pôa Lê Minh Khái pơkâ thế, kong pơlê Quảng Bình kal mơdêk tơƀrê ƀă 4 tơdroăng ki xiâm mơnhông mơdêk, 3 tíu xiâm kơphô̆, 3 hang lơng cheăng kâ , 2 tíu xiâm mơhnhôk mơdêk ƀă 3 tơdroăng cheăng tơƀrê. Hlối mơdêk hnoăng cheăng rak ngăn, tí tăng ngăn pêi pro tiô pơkâ, tiô rơnó séa ngăn, teăm tối tơbleăng ăm râ kơpêng mâu tơdroăng xơpá, tơvâ tơvân tung tơdroăng tơbleăng pơkâ.

Pơtối pê klêi xoăng hnoăng cheăng pêi dêi khu kăn iâ mơngế la pêi cheăng ƀeăn rơkê hlối tơƀrê, xua kuăn pơlê, achê ƀă kuăn pơlê. Mơhnhôk tăng liăn cheăng vâ mâu kong pơlê Peăng Kơnhŏng Tơdế tơnêi têa rĕng ‘mâi mơnhông tơƀrê.