VOV4.Xơ Đăng - Kơxê lơ 25/9, pôa Lê Văn Thành, Ngế pro xiâm hnê ngăn Chin phuh hiăng pơkuâ roh hôp mơ’no tơdrêng tung um tiô troăng hyôh măng pêi pro hbrâ ví kong mêi khía mơhot Noru. Tiô pôa Trần Hồng Thái, Kơ koan xiâm pơkuâ pơtâng tối hyôh kong prâi, Kong mêi khía mơhot Noru dế plong mot a têa kơxĭ Biển Đông ƀă kô chiâng kong mêi khía mơhot roh má 4 tung hơnăm kố.

Pôa Lê Văn Thành, Ngế pro xiâm phŏ hnê ngăn tơnêi têa hnê mơhno hbrâ ví kong mêi khía mơhot Noru

Kố cho kong mêi khía mơhot rơdêi má môi tung pơla 20 hơnăm ngiâ kố tơdjâk troh kơpong peăng tơdế tơnêi têa. Xông tơpui a roh hôp, Ngế pro xiâm phŏ hnê ngăn Chin phuh pơkâ mâu khu xiâm, mâu kong pơlê kal hbrâ tơkŭm pêi pro xĕn kuăn pơlê, kơbông krếo mâu ngế vê plong lăm a tíu tơniăn ƀă kong pơlê khŏm ôh tá tơngôu, thế kơchăng. Khu xiâm pơkuâ lêng, Khu xiâm pơkuâ troăng prôk ƀă rơxế kơtâu tơrŭm ƀă mâu kong pơlê séa ngăn, vê djâ plong tuk  a têa kơxĭ troh tíu tơniăn, rế tơniăn ăm kuăn pơlê, ví lôi ai tơdroăng tuk troh hmuâ a tíu tơniăn xuân ối tro lŭp.

Ối a peăng kơnhŏng kơpong Tây Nguyên, kong pơlê Kon Tum tiô tối hdrối kô tro tơdjâk rơdêi dêi khía mơhot kân Nô-ru. Vâ hbrâ ví ƀă tơdroăng ki tơdjâk dêi khía mơhot, Vi ƀan hnê ngăn kong pơlê Kon Tum hiăng ai hlá mơéa pơtroh ăm khu kăn pơkuâ mâu tơring, cheăm, kơvâ cheăng ki ai tơdjâk troh ƀă mâu tíu pêi cheăng ki pơkuâ rak ngăn long, rơchoâ têa, hngêi kơmăi on tơhrik vâ hbrâ ví. Tiah mê, kăn hnê ngăn Vi ƀan kong pơlê Kon Tum pôa Lê Ngịc Tuấn pơkâ thế hbrâ bí ƀă kong mê khía mơhot tiô túa pơkâ “4 tơdrêng” tơtro ƀă tơdroăng ki ôh tá tơniăn dêi khía mơhot, tơdroăng pêi pro nhên a tơring cheăm ƀă tơbleăng tơdroăng, tối tơbleăng teăm tơdrêng troh kuăn pơlê vâ hbrâ ví. Mâu tơring, pơlê kong kơdrâm tơbleăng pơtroh mâu khu ngế ki djâ troăng ahdrối séa ngăn mâu kơpong kuăn pơlê rêh ối a kĭng têa kroăng, têa plông, long rơchoâ, kơpong ki thông, ki mơni tơ’lêi tro tơhnah tơhnâp, lân lu vâ tơkŭm ‘mâi xê̆n kuăn pơlê troh ối a tíu tơniăn tâng lơ trâm.

A Sa Ly tơplôu ƀă tơbleăng