VOV4.Xơ Đăng - Xua tơdjâk dêi kong mêi khía mơhot roh má 4, sap kơmăng lơ 27/9 troh hâi lơ 28/9, kơpong Quảng Trị, Thừa Thiên – Huế, Đà Nẵng, Quảng Nam, Quảng Ngãi, Kon Tum kong mêi kân ƀă mêi 250 – 350 mm. Kơpong Quảng Bình, Bình Định, Gia Lai ai kong mêi kân ƀă kong mêi 100 – 200mm, ai tíu lối 300mm.

Pôa Lê Văn Thành, Ngế pro xiâm phŏ hnê ngăn Chin phuh pơkuâ roh hôp Khu hnê mơhno kơpong hbrâ ví kong mêi khía mơhot roh má 4

Troh kơxo hâi lơ 28/9, kong mêi khía mơhot roh má 4 hiăng plong mot a tơnêi tơníu pro khía pê têi lâp kơpong Quảng Trị, Đà Nẵng, Quảng Nam, Quảng Ngãi, Bình Định, Phú Yên, Kon Tum ƀă Gia Lai, kơ’nâi mê, kong mêi khía mơhot plong mot a kơpong peăng hdroh kong têa Lếo ƀă chiâng kong mêi hngê.

A roh hôp Khu hnê mơhno hbrâ ví kong mêi khía mơhot roh má 4 kơmăng hnah (27/9), pôa Lê Văn Thành, Ngế pro xiâm phŏ hnê ngăn tơnêi têa pơchân, kong mêi khía mơhot têi râ 13, hrot râ 14, hrot troh râ 17, hlối ai kong mêi kân. Xua mê, kal tơkŭm hbrâ, mơhnhôk hên mâu khu ngế, tá khu cheăng kal kí ing Tơnêi têa troh kong pơlê pêi pro mâu troăng vâ tŏng kum kuăn pơlê.

Hbrâ ví ƀă kong mêi khía mơhot roh má 4 tiô tơdroăng thâ hbrâ tâ mê nếo, tâi tâng xua châ chăn, tơmeăm khoăng dêi kuăn pơlê, thế tơmiât châ kuăn mơngế cho apoăng, ôh tá lôi kuăn pơlê xua tŏng xo dêi tơmeăm mê tơdjâk troh châ chăn.

VOV/Tơplôu: A Sa Ly