VOV4.Xơ Đăng - A tíu pêi cheăng Chin phuh, pôa Pôa Lê Văn Thành, Ngế pro xiâm phŏ hnê ngăn tơnêi têa pơkuâ roh hôp Hô̆i đong mơnhên pơkâ pêi tơmeăm têa rơxông hơnăm 2021 – 2030, tơmiât pêi troh hơnăm 2050. Kố cho pơkâ pêi kơvâ tơnêi têa roh apoăng châ mơjiâng tung kơvâ tơmeăm têa, cho mơnhên troăng prôk la ngiâ tâi tâng ăm mâu pơkâ pêi kơvâ tơnêi têa, pơkâ pêi kơpong, pơkâ pêi kong pơlê, pơkâ pêi kơpong têa kroăng ƀă mâu pơkâ pêi tiô kih thuât kơvâ cheăng ai hrik chuâ, xúa têa.

Mơgêi roh hôp, pôa Lê Văn Thành kheăn kơdeăn tơdroăng mơ-eăm dêi Khu xiâm pơkuâ kế tơmeăm khoăng ƀă kong prâi tung tơdroăng pơkuâ tơrŭm ƀă mâu Khu xiâm, kơvâ cheăng, kong pơlê, mâu kơ koan, khu tơrŭm cheăng lâp plâi tơnêi, mâu ngế rơkê, khoa hok vâ mơjiâng pơkâ pêi tơniăn dâi lĕm, pêi tiô mâu pơkâ dêi luât ‘na pơkâ pêi. Ngế pro xiâm phŏ hnê ngăn tơnêi têa pơkâ thế Khu xiâm pơkuâ kế tơmeăm khoăng ƀă kong prâi tơmâng xo rơkong tơpui tối ‘mâi rơnêu, kêi đeăng, pâ rơkong veăng tơpui dêi mâu khu cheăng Hô̆i đong ahdrối tơbleăng râ ai hnoăng séa ngăn kĭ ăm pêi pro.

A Sa Ly tơplôu ƀă tơbleăng