Kơxê lơ 18/10, pôa Lê Văn Thành, Ngế pro xiâm phŏ hnê ngăn Chin phuh hiăng lăm séa ngăn hnoăng cheăng ‘mâi mơnhông klêi kơ’nâi xua kong mêi têa kân lân lu a kong pơlê Quảng Trị. Ngế pro xiâm phŏ hnê ngăn tơnêi têa hiăng lăm séa ngăn, pơkâ thế hnoăng cheăng ‘mâi rơnêu tíu ki tơhnâp, tơhnah ki ó a troăng kân 15D lăm Bo cheăng lâp plâi tơnêi La Lay, troăng ki tơkâ luâ cheăm A Ngo, tơring Đakrông. Pôa Lê Văn Thành hiăng pơkâ thế kong pơlê Quảng Trị ƀă mâu tíu pêi cheăng ki ai tơdjâk troh rĕng ‘mâi rơnêu, rĕng tơbleăng bro troăng prôk ki pơtân, rĕng ăm rơxế châ prôk lăm a troăng ki xiâm tâk troh a Bo cheăng lâp plâi tơnêi La Lay.

Tơdroăng ki tro tơhnah tơhnâp ki ó a troăng kân 15D lăm Bo cheăng Lâp plâi tơnêi La Lay

Ngế pro xiâm phŏ hnê ngăn tơnêi têa xuân tối nhên, kố cho troăng ki lăm troh Bo cheăng lâp plâi tơnêi La Lay, rơxế ki hngăm kơtâu tơkâ luâ, xua mê tơdroăng ki pro troăng pơtân lơ ‘mêng rơnêu troăng xiâm xuân athế rak tơniăn. Drêng hiăng ăm rơxế prôk lăm mê athế rak vế ki dâi lĕm, maluâ troăng prôk pơtân xuân pôi tá bro tơbréa, pôi tá pro pá ăm tơdroăng ki rơxế kơto prôk lăm mê bro ôh tá tơniăn bro chiâng ai mâu tơdroăng xía vâ.