Klêi kơ’nâi khu kố hiăng lăm ngăn nhên khât tơdroăng ki ‘mâi rơnêu ‘na tơdroăng cheăng ki pêi pro tá hâi teăm tro, khoh tro pơxâu theh trĭng ‘na tơnăng ká xi xŏng ki ôh tá tro luât, ôh tá tối tơbleăng ƀă ôh tá rak vế, pêi pro tiô pơkâ dêi IUU a Việt Nam. A chôu phut tơdah mê, pôa Lê Văn Thành, Ngế pro xiâm phŏ hnê ngăn tơnêi têa vêh mơnhên tối, Việt Nam hiăng ƀă dế kơdo mơ-eăm kân ó má môi vâ tơleăng mơnhên lĕm tro mâu tơdroăng pơkâ thế dêi EC ƀă tơdroăng ki mơdât ‘na ká xi xŏng ki pơkâ tiô IUU vâ la ngiâ kô chiâng ai tơdroăng ki tơnăng ká xi xŏng tro tiô luât, krá tơniăn, pôu râng hnoăng cheăng, châ seá mơnhên ngăn.

Pôa Lê Văn Thành, Ngế pro xiâm phŏ hnê ngăn tơnêi têa xông tơpui a roh tơdah

Ngế pro xiâm phŏ hnê ngăn ƀă mâu kong têa ối tung Khu xiâm tơrŭm châu Âu pơtối tơrŭm cheăng krá kâk ƀă veăng kum kih thuât teăm tơdrêng, pơkâ pêi pro troh hnoăng cheăng ki xiâm dêi tơnăng ká xi xŏng Việt Nam tung tơdroăng rak vế pêi pro tiô mâu tơdroăng pơkâ hnê dêi Khu tơrŭm châu Âu ƀă IUU. Pơkâ thế Vi ƀan châu Âu vêh mơnhên tối ki kơdo mơ-eăm tơplâ mơdât tơdroăng ki tơnăng ká xi xŏng ôh tá tro luât ƀă mâu tơdroăng cheăng ki châ tơƀrê dêi Việt Nam ki hiăng châ chiâng pêi pro ƀă hnối tah lôi theh trĭng ăm Việt Nam.