Tung roh lăm pôu râ Tơnêi têa Kŏng hoa Ejiptô, kơxo lơ 4/8 (chô kong vâi), pôa Lương Cường, Kăn xiâm hnê ngăn tơnêi têa ƀă khu râ kăn teăng mâ râ xiâm Việt Nam hiăng troh lăm pôu ƀă xông tơpui a Tíu pêi cheăng Liên đoân Arab a pơlê kong xiâm Cairo ƀă dó inâi ‘’Po môi tơdroăng nếo tung tơrŭm nhŏng o ƀă tơrŭm cheăng pơla Việt Nam ƀă mâu kong têa Ả-rập xua hơniêp lĕm, tơrŭm ƀă mơnhông mơdêk’’.

Liên đoân Arab cho khu tơrŭm cheăng dêi mâu kong têa Arab tung kơpong châu Phi ƀă rơlố Arab, châ mơjiâng sap hơnăm 1945. Nôkố, Liên đoân Arab ai 22 kong têa ối tung khu tơrŭm. Khế 7/2023, Việt Nam ƀă Liên đoân Arab hiăng mơjiâng troăng tơrŭm cheăng.

Xông tơpui a kố, pôa Lương Cường, Kăn xiâm hnê ngăn tơnêi têa tối rơdêi: Việt Nam pói vâ rơtế chêh môi tơdroăng nếo tung tơrŭm hên pâ pơla Việt Nam ƀă mâu kong têa Arab nhŏng o xua hơniêp lĕm, tơrŭm ƀă mơnhông mơdêk. Vêh tối mâu tơdroăng châ tơƀrê kân kơnâ dêi Việt Nam tung vâ chê 40 hơnăm pơhlêh nếo, Kăn xiâm hnê ngăn tơnêi têa xuân tối 5 túa ki rơkê tơtro kân. Nôkố Đảng, Tơnêi têa Việt Nam hiăng mơhno troăng pêi cheăng nếo, mơ-eăm troh hơnăm 2045 djâ Việt Nam chiâng tơnêi têa mơnhông mơdêk, pêi lo liăn hên. Kăn xiâm hnê ngăn tơnêi têa mơnhên Việt Nam đi đo nhuô̆m, rak ƀă hâk tơngăm drêng ai tơdroăng tơrŭm tơpui kâ ƀă tâi tâng 22 kong têa ối tung khu tơrŭm dêi Liên đoân Arab, ƀă hên kơvâ tơrŭm cheăng rế hiá rế păng ‘nâng ƀă châ tơƀrê. Kăn xiâm hnê ngăn tơnêi têa xuân pơkâ thế péa pâ thăm tơrŭm tâ mê nếo tơrŭm cheăng a mâu tíu hôp tơpui tơno hên pâ kơpong ƀă lâp plâi tơnêi, rơtế dêi pó mơdêk hơniêp lĕm krá tơniăn a péa kơpong, kum mơjiâng môi plâi tơnêi lĕm tro tâ, rơkê tâ, tơxâng rêh tâ./.