Xông tơpui a roh pêi cheăng, pôa Lương Cường, Kăn xiâm hnê ngăn  pơkâ thế mâu Kăn teăng mâ tơmâng hên tâ mê nếo, hbrâ pêi hên tâ mê nếo tung tơdroăng pêi cheăng pơlê pơla ƀă tŏng gum kuăn pơlê, mơ-eăm tâi ivá tung tơdroăng tŏng gum kuăn pơlê pin ki rêh ối pêi cheăng a kong têa ê, mơdêk tíu cheăng dêi pơlê pơla pin a kong têa vâi xuân môi tiah tơrŭm krá tơniăn ƀă khu râ kăn pơkuâ a kong vâi tung tơdroăng tŏng gum kuăn pơlê, tŏng gum khu tê mơdró Việt Nam.

Kăn xiâm hnê ngăn tơnêi têa mơnhên, Đảng ƀă Tơnêi têa đi đo tơmâng ƀă pro tơ’lêi hlâu ‘na pơkâ pêi, troăng hơlâ, tơxâng mâu pơkâ kum tơdroăng pêi cheăng xuân môi tiah rak ngăn tơdroăng rêh ối kế tơmeăm khoăng, hiêm mơno dêi rêm kăn ƀô̆, nhân viên; tơniăn troăng pơkâ mơhá liăn ƀă mâu ngế pêi cheăng kơ koan teăng mâ Việt Nam a kong têa ê tơtro ƀă tơmeăm ki ai hlâu, tíu pêi cheăng ƀă tơdroăng cheăng kâ dêi tơnêi têa tung rơxông nếo.