Roh lăm pôu pêi cheăng vâ kum pro thăm loi tơngah kal kí, tơdrêng amê mơdêk tơrŭm cheăng pơla Việt Nam ƀă Sri Lanka tung tâi tâng mâu tơdroăng cheăng kal kí, tơpui kâ ƀă kong têa ê, gâk kring, cheăng lêng, cheăng kâ, tê mơdró, mơ’no liăn cheăng, trâm mâ pơla kuăn pơlê... prôk trâu hơngế păng ‘nâng, châ tơƀrê tâ. Tơdroăng Kăn xiâm pơkuâ kong têa Sri Lanka troh Việt Nam veăng a Tĭng kân Phật đản Khu lâp kong têa Vesak cho vâ mơnhên ăm tơdroăng tơdjêp trâu hơngế ‘na khôi túa lĕm tro ƀă tơdroăng khôp Phop pơla péa tơnêi têa.

Klêi leh tơdah, pôa Lương Cường, Kăn xiâm hnê ngăn tơnêi têa ƀă Kăn xiâm pơkuâ kong têa Sri Lanka pơkuâ djâ Khu râ kăn xiâm péa tơnêi têa tơkŭm tơpui tơno, mơnhên tơdroăng châ tơƀrê tơrŭm pơla péa tơnêi têa tung pơla kố nah ƀă pơkâ mâu troăng pêi tơrŭm cheăng tung la ngiâ.