Kơ’nâi mê, péa ngế kăn xiâm pơkuâ hiăng tơkŭm po tơpui tơno. Péa pâ mơnhên tơrŭm cheăng ki má môi Việt Nam – Lếo cho tơmeăm ki kơnía xua mâu rơxông pôa pâ mơ’no ivá mơjiâng, kal châ rak ƀă mơnhông. Pôa Lương Cường, Kăn xiâm hnê ngăn tơnêi têa kheăn kơdeăn mâu tơdroăng châ tơƀrê mơnhông dêi Lếo, mơnhên Việt Nam kô tŏng gum Lếo tung mot tơrŭm lâp plâi tơnêi ƀă mơnhông cheăng kâ tơniăn krê, pơkuâ xêh.

Péa kăn xiâm pơkuâ môi tuăn kal tăng troăng pêi nếo, djâ ki mơnhông vâ mơdêk châ tơƀrê tơrŭm cheăng kâ, khôi túa lĕm tro, khoa hok kih thuât ing tơdroăng mơnhông tâi tâng tơmeăm ki ai hlâu ƀă ki rơdêi rêm rêm kong têa, tung mê, thăm tơdjêp ó rơdêi ‘na cheăng kâ, hngêi trăng, troăng klông, kơxô̆ liăn 'mot mơ'no tơnêi têa – liăn ngân ƀă mơ’no hrê, ôm hyô péa tơnêi têa; pêi pro mâu troăng pêi châ tơƀrê vâ mơ-eăm mơdêk pêi lo liăn tâk 05 rơtal dollars tung mâu hơnăm la ngiâ.