Khĕn kơdeăn hiâm mơno pôu râng dêi hnoăng, ivá mơ-eăm dêi mâu kăn ƀô̆, kong chưk, ngế pêi cheăng, Kăn xiâm hnê ngăn tơnêi têa tối tơdrăng mơhno nhên, ‘na tơdroăng ki pơkâ thế rế hía rế kơtăng dêi tơdroăng cheăng tung hneăng nếo, Ƀơrô cheăng kăn xiâm hnê ngăn tơnêi têa kal pơtối pơhlêh rơdêi tâ nếo; thăm mơnhông hriâm tâp, hriăn plĕng, mơdêk ki rơkê tung tí tăng ‘nâi plĕng; séa ngăn kơtăng mâu kơvâ cheăng, tơdroăng cheăng châ pơcháu, hnoăng pơkuâ dêi Kăn xiâm hnê ngăn tơnêi têa, phŏ kăn xiâm hnê ngăn tơnêi têa vâ mơ’no teăm tơdrêng, tơdrăng, tro, tơƀrê.

Kăn xiâm hnê ngăn tơnêi têa pơkâ thế Ƀơrô cheăng mơnhông khôi hmâ lối 80 hơnăm mơjiâng ƀă mơdêk, rak vế krá tơniăn tơrŭm, mơdêk hiâm mơno pôu râng, “ro rơnó hơngui nếo la ôh tá piu tơdroăng cheăng”, khŏm mơ-eăm pêi klêi mâu tơdroăng cheăng châ pơcháu, veăng gum rơtế ƀă tâi tâng Đảng, tâi tâng kuăn pơlê ăm tơnêi têa mơnhông rĕng ƀă krá tơniăn.