Kơxo lơ 26/6, leh tơdah păng ‘nâng pôa Phạm Minh Chính, Ngế pro xiâm hnê ngăn Chin phuh ƀă Khu kăn ki pêi dêi hnoăng cheăng Việt Nam lăm pôu păng ‘nâng Sinuâ hiăng châ tơkŭm po kân krip a Đại lễ đường Nhân dân a pơlê kong xiâm Bắc Kinh, xua pôa Lý Cường, Ngế pro xiâm hnê ngăn kong têa Sinuâ pơkuâ po. Klêi kơ’nâi leh tơdah, pôa Lý Cường pơkuâ djâ khu kăn xiâm Việt Nam po hôp tơpui tơno.

Rôh lăm pôu kố cho vâ pro hơ’lêh tơdroăng ki lăm pôu păng ‘nâng Sinuâ dêi pôa Nguyễn Phú Trọng, Kăn xiâm pơkuâ hnê ngăn Đảng a mơ’nui hơnăm 2022. Péa pâ kô vêh tối mâu tơdroăng ki tơrŭm cheăng ki châ mơnhông tơƀrê tung pơla hdrối nah, pơkâ mơ’no mâu túa ki pơkâ, hnoăng cheăng vâ ‘mâi mơnhông ƀă mơdêk tơrŭm cheăng ƀă tơrŭm tung la ngiâ, malối cho mâu troăng hơlâ po rơdâ ƀă mơdêk châ tơƀrê tơrŭm tung mâu kơvâ cheăng, mơdêk tơdroăng ki tŏng kum mâu tơdroăng tơvâ tơvân tung pơla tơrŭm cheăng; tơpui tơno tiô hiâm mơno tơrŭm tơroâ, tơdrăng, loi nhuô̆m, hlê plĕng dêi rơpó, xua hơniâp lĕm, tơrŭm ƀă mơnhông.