A rôh hôp, mâu ngế ki vâ tơbriât to pro kăn pơchuât tơbleăng tơdroăng pêi pro, tơkŭm tung tơdroăng veăng mơjiâng luât, thăm mơnhông tơdroăng séa ngăn, pơkâ mơ’no troăng hơlâ mơnhông cheăng kâ rêh ối pơlê pơla, pơhlêh túa ki chêh pro hlá mơ-éa, tŏng gum khu mơdró kâ ƀă thăm mơdêk tơdroăng rêh kâ ối kuăn pơlê. Mâu ngế ki tơbriât vâ to pro kăn tối nhên tâng châ kuăn pơlê pôk kô pêi pro tŭm hnoăng cheăng dêi ngế kăn ngăn kuăn pơlê, rak tơdroăng tơrŭm, tơpui tơno đi đo ƀă kuăn pơlê, tối tơbleăng tơdroăng tiô tuăn hiâm kuăn pơlê vâ, tơdroăng púi vâ tơxâng dêi kuăn pơlê ăm Kuô̆k hô̆i.

Pôa Nguyễn Khắc Định, Phŏ kăn hnê ngăn Kuô̆k hô̆i tối nhên, tâng châ kuăn pơlê pôk kô pơtối veăng gum tuăn ngoâ, tơdroăng ki rơkê dêi tơná tung hnoăng cheăng mơjiâng luât, séa ngăn nhên ƀă pơkâ mâu tơdroăng ki kal dêi tơnêi têa, rak vế hnoăng ƀă ki pơxúa tơtro luât ăm kuăn pơlê.