Kơxo lơ 3/7, pôa Nguyễn Phú Trọng, Kăn xiâm pơkuâ hnê ngăn cheăng Đảng Tơnêi têa pơkuâ po rôh hôp khu pơkuâ ngăn Đảng lêng Tơnêi têa rôh má 6. Tiô tối tơbleăng a rôh hôp, 6 khế hdrối nah Khu pơkuâ ngăn Đảng lêng Tơnêi têa, Khu xiâm pơkuâ ngăn lêng ƀă khu râ kăn Đảng, khu pơkuâ rêm râ hiăng pơkuâ, hnê mơhno tâi tâng khu lêng tơrŭm, môi tuăn, hbrâ rơnáu ‘mâi mơnhông xơpá, pêi klêi tâi tâng mâu hnoăng cheăng.

Tung mê, ki xiâm cho hbrâ rơnáu hriăn ngăn, mơnhên tối tro tơdroăng, tí tăng ‘nâi plĕng, pơkâ mơ’no ăm Đảng, Tơnêi têa pơkâ tơleăng mâu tơdroăng, pôi tá tro tơngôu, kơdrâ, rak vế krá tơniăn hnoăng pơkuâ dêi Tơnêi têa. Tơbleăng pêi pro kơtăng mâu pơkâ dêi Khu pơkuâ ngăn Đảng lêng Tơnêi têa ‘na hnê hriâm ƀă hnê cheăng; rơkê tung hnê hriâm, hnê cheăng, hriâm tâp, rôh hôp, rôh po tơ’noăng ivá a mâu kơ koan, tíu pêi cheăng ƀă mâu hngêi trung châ mơdêk.

6 khế mơ’nui hơnăm, Khu xiâm pơkuâ hnê ngăn Đảng lêng Tơnêi têa mơnhên mâu hnoăng cheăng ki kal tơkŭm pơkuâ, hnê mơhno tung hnoăng cheăng lêng gak kring, tung mê pơtối mơjiâng Đảng ƀô̆ Khu pơkuâ ngăn Đảng lêng krá rơdêi ‘na tơdroăng kal kí hiâm mơno, túa rêh ối, tơrŭm ƀă kăn ƀô̆; Khu lêng krá rơdêi ‘na kal kí. Tơkŭm pơkuâ, hnê mơhno tơbleăng pêi pro, mơgêi ‘na hnoăng cheăng lêng, gâk kring, rak vế Tơnêi têa tung tơdroăng nôkố.