Kơxo lơ 19/6, pôa Nguyễn Phú Trọng, Kăn xiâm pơkuâ hnê ngăn Đảng pơkuâ po rôh hôp ‘no tơdrêng ing troăng hyôh internet troh a 63 to kong pơlê tung lâp tơnêi têa mơgêi 1 hơnăm pêi cheăng dêi Khu hnê mơhno cheăng râ kong pơlê ‘na hbrâ mơdât kâ kơluâ liăn ngân. Môi hơnăm hdrối nah, mâu Khu hnê mơhno cheăng râ kong pơlê hiăng pêi pro vâ chê 150 rôh séa ngăn ‘na hnoăng cheăng hbrâ mơdât kâ kơluâ liăn ngân.

Klêi kơ’nâi séa ngăn hiăng châ hlo hên tơdroăng ki bro xôi; pâ thế pơxâu phâk hên khu tơrŭm Đảng, đảng viên bro xôi. Bu tung môi hơnăm, mâu Khu hnê mơhno râ kong pơlê hiăng séa ngăn, ăm 600 rôh bro tơdroăng xôi, tơdroăng ki kâ kơluâ tung tơdroăng ki séa ngăn, hnê mơhno vâ tơkŭm hnê mơhno pơxâu phâk. Hên kong pơlê hiăng châ hlo, pơsăm tối, séa ngăn, pơxâu phâk hên rôh xôi ki kân, hên kăn ƀô̆ ối tung Khu pơkuâ hnê ngăn Đảng kong pơlê, khu kăn pơkuâ ngăn Đảng pơlê kong kơdrâm pơkuâ ngăn.

Klêi kơ’nâi mơhno nhên 5 tơdroăng ki xiâm ƀă ƀai hriâm ki rơkê vâ pơtối mơdêk tâ nếo tơƀrê tơdroăng cheăng dêi Khu hnê mơhno râ kong pơlê tung la ngiâ, pôa Nguyễn Phú Trọng, kăn xiâm pơkuâ hnê ngăn Đảng pơkâ thế, Khu hnê mơhno cheăng mâu kong pơlê, pơlê kong kân kal pơtối pêi pro kơtăng, hlê plĕng trâu rơdâ tâ nếo ‘na tíu cheăng, hnoăng cheăng hnoăng pơkuâ dêi khu hnê mơhno râ kong pơlê; athế pêi cheăng tro tơdroăng, tro tơdroăng pơkâ, tro hnoăng cheăng.