Pơtối lăm pôu kong têa Sinuâ, kơxo hâi lơ 1/11, pôa Nguyễn Phú Trọng, Kăn xiâm pơkuâ hnê ngăn Đảng hiăng tơpui tơno ƀă pôa Lý Khắc Cường, Ngế pro xiâm hnê ngăn kong têa Sinuâ. Pôa Nguyễn Phú Trọng, Kăn xiâm pơkuâ hnê ngăn Đảng tối, Việt Nam ƀă Sinuâ cho péa tơnêi têa ki achê hmâ dêi rơpó, ai tơdroăng cheăng tơrŭm ing ton nah, ai hên tíu ki vâ môi tiah dêi rơpó ‘na tơdroăng kal kí ƀă troăng prô mơnhông mơdêk.

Rơtâ tá hâi hôp tơpui tơno

Péa Đảng, péa tơnêi têa ƀă kuăn pơlê péa tơnêi têa hiăng ‘măn ăm dêi rơpó tơdroăng veăng kum ki kơnía tung tơdroăng tơplâ rak tơniăn lĕm hdroâng mơngế hdrối nah ƀă tơdroăng mơjiâng chuh ngiah xah hô̆i nôkố. Việt Nam nhoăm ƀă đi đo pêi ahdrối tơdroăng mơnhông tơrŭm cheăng ƀă Sinuâ; hdrối hmâ kơ’nâi xuân môi tiah, mơ-eăm tiô luât pơkâ “môi tơnêi têa Sinuâ”.

Pôa Nguyễn Phú Trọng, Kăn xiâm pơkuâ hnê ngăn Đảng hôp tơpui tơno ƀă Ngế pro xiâm hnê ngăn kong têa Sinuâ

A rôh hôp tơpui tơno, péa pâ tối phiu ro hlo mơnhông tơƀrê, tơdroăng tơrŭm cheăng péa Đảng, péa tơnêi têa tung mau hơnăm hdrối. Péa pâ vâ môi tuăn tung pơla mơnhông mơdêk nếo dêi péa Đảng, péa tơnêi têa ƀă pơla lâp plâi tơnêi nôkố, kal mơdêk, tơrŭm cheăng tung tâi tâng mâu tơdroăng, pơtối rak vế đi đo tơpui tối, trâm mâ mâu kăn, mơdêk loi nhoăm dêi rơpó ‘na tơdroăng kal kí, ‘mâi mơnhông mơdêk, mơdêk tơrŭm tê mơdró ‘no liăn cheăng, pro xiâm ai tơmeăm, ki mơnhông mơdêk tơrŭm cheăng péa tơnêi têa; tơkŭm mơnhông tê mơdró pơla péa pâ tâk tơniăn, krá ton.