Kơxê lơ 31/10, a Đại lễ đường Nhân dân, klêi leh tơdah pôa Nguyễn Phú Trọng  Kăn xiâm pơkuâ hnê ngăn Đảng hiăng ai rôh hôp tơpui ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ. Tung chôu phut hơniâp ro tơpui tơdrăng lĕm, péa ngế kăn xiâm hiăng tơpui ‘na tơdroăng rêm Đảng, rêm tơnêi têa ƀă hlối tơpui ‘na tơrŭm cheăng péa Đảng, péa tơnêi têa. Pôa Nguyễn Phú Trọng, Kăn xiâm pơkuâ hnê ngăn Đảng tối, Việt Nam ƀă Sinuâ cho péa tơnêi têa achê dêi rơpó, ngo, têa kroăng tơdjuôm, xuân cho tơnêi têa xah hô̆i chuh ngiah xua Đảng Kŏng sản pơkuâ. 

Pôa Nguyễn Phú Trọng, Kăn xiâm pơkuâ hnê ngăn Đảng hôp tơpui tơno ƀă pôa Tập Cận Bình Kăn xiâm pơkuâ hnê ngăn Đảng, kăn xiâm hnê ngăn kong têa Sinuâ

Péa pâ vâ môi tuăn pơtối rak vế tơpui tơno, trâm mâ tơrá mâu kăn đi đo pơla péa ngế Đảng, péa tơnêi têa vâ mơdêk hlê plĕng dêi rơpó, teăm tơpui, tơleăng mơnhên mâu tơdroăng nếo ‘nâi tung tơrŭm cheăng pơla péa pâ, pơtối rak tơrŭm ƀă mơnhông rơdêi, rak tơniăn tơdroăng cheăng pơla Việt Nam - Sinuâ.

Klêi hôp tơpui tơno, pôa Nguyễn Phú Trọng, Kăn xiâm pơkuâ hnê ngăn Đảng rơtế ƀă pôa Tập Cận Bình, Kăn xiâm pơkuâ hnê ngăn Đảng, kăn xiâm hnê ngăn kong têa Sinuâ hiăng hlo mâu Khu râ, Khu xiâm kơvâ cheăng, kong pơlê péa tơnêi têa kĭ mâu hlá mơ-éa tơrŭm cheăng tung hneăng lăm pôu

Tung rôh hôp tơpui, péa ngế kăn xiâm pơkuâ hnê ngăn Đảng xuân tơpui trâu troh mâu tơdroăng tơrŭm cheăng ki khât, vâ môi tuăn mơdêk rơdêi tơƀrê tơdroăng tơrŭm cheăng tung mâu tơdroăng cheăng kâ, tê mơdró, ‘no liăn cheăng, pro xiâm krá kâk ăm mơnhông tơrŭm pơla péa pâ; tối nhên Việt Nam -Sinuâ cho tơnêi têa tơrŭm cheăng ki kal ƀă hên tơmeăm khoăng vâ mơnhông ăm dêi rơpó.

Pôa Tập Cận Bình tối, Sinuâ kô mơ-eăm vâ pơtối rak vế mơnhông mơdêk tơrŭm cheăng tê mơdró pơla Sinuâ - Việt Nam tiô troăng rế ton rế tơdâng tâ; pro tơ’lêi hlâu ăm Việt Nam châ tê dêi mâu tơmeăm pêi lo ing chiâk deăng, loăng kong , ká xi xŏng ngi kong têa Sinuâ tung la ngiâ.