Kơxo lơ 10/1, pôa Nguyễn Phú Trọng,Kăn xiâm pơkuâ hnê ngăn Đảng pơkuâ djâ khu râ kăn pêi cheăng Tơnêi têa troh lăm pôu, pêi cheăng ƀă rơkâu Têt  Đảng ƀô̆, khu râ kăn pơkuâ ƀă kuăn pơlê kong pơlê Thái Nguyên. Klêi kơ’nâi lăm pôu diâp kơxuô tơmeăm Têt rơpŏng mâu ngế hiăng krâ hneăng hdrối nah pêi kăch măng cho pôa Nguyễn Trung Lựu (ối a bêng Ba Hàng, pơlê kong kơdrâm Phổ Yên), pôa Nguyễn Phú Trọng ƀă Khu râ kăn pêi cheăng troh lăm pôu Khu tơrŭm cheăng chế Hảo Đạt, cheăm Tân Cương, pơlê kong kơdrâm Thái Nguyên.

Xông tơpui a roh pêi cheăng ƀă Khu pơkuâ cheăng Đảng kong pơlê Thái Nguyên, pôa Nguyễn Phú Trọng mơnhên, cho kong pơlê ai tíu pêi cheăng ton xŏn ki kal, cho kong pơlê pêng păm tơdroăng pâ nhuô̆m tơnêi têa ƀă kăch măng, tíu rak hên ki kơnâ khôi túa lĕm tro ki má môi dêi vâi krâ kuăn pơlê mâu hdroâng kuăn ngo.

Pôa Nguyễn Phú Trọng pơkâ thế, Đảng ƀô̆ kong pơlê Thái Nguyên kal hlê plĕng tro ƀă trâu hơngế tâ nếo ‘na tơdroăng nôkố ƀă tơdroăng tơdjuôm; mơnhên tơmeăm ki ai hlâu, ki pơxúa dêi kong pơlê vâ ing mê pơkâ thế pơkâ pêi, rah xo hnoăng cheăng xiâm ƀă tơdroăng mơnhông mơdêk vâ tơkŭm khu râ kăn pơkuâ, hnê mơhno, pro pơ’lêh nếo, ó rơdêi tâ tung mơnhông mơdêk cheăng kâ – rêh ối pơlê pơla.