Kơmăng lơ 1/11, pôa Nguyễn Phú Trọng, Kăn xiâm pơkuâ hnê ngăn Đảng ƀă Khu râ kăn xiâm Việt Nam hiăng troh Hà Nội, mơgêi lĕm tro roh lăm pôu pêi cheăng kong têa Sinuâ tiô rơkong krếo thế dêi pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ. Tung pơla roh lăm pôu pêi cheăng, pôa Nguyễn Phú Trọng hiăng tơpui tơno ƀă pôa Tập Cận Bình, pôa Lý Khắc Cường, Ngế pro xiâm hnê ngăn kong têa Sinuâ, trâm mâ tơpui tơno ƀă pôa Lật Chiến Thư, Kăn xiâm hnê ngăn Kuô̆k hô̆i kong têa Sinuâ ƀă pôa Uông Dương, Kăn xiâm hnê ngăn kong têa Sinuâ.

Khu râ kăn pơkuâ Đảng, Tơnêi têa lo a tơraih tơƀai tơdah Kăn xiâm pơkuâ hnê ngăn Đảng

Tung roh lăm pôu pêi cheăng, péa pâ hiăng kĭ tơkêa 13 kơtâ hlá mơ-éa ki kal tơrŭm cheăng tung mâu kơvâ cheăng; tơbleăng tơdjuôm Việt Nam – Sinuâ ai 13 tơdroăng. Mơnhên tiah kố, roh lăm pôu pêi cheăng kong têa Sinuâ dêi pôa Nguyễn Phú Trọng, Kăn xiâm pơkuâ hnê ngăn Đảng hiăng châ tơƀrê lĕm, kum hên tơdroăng mơnhông rŭm môi tuăn, nhŏng o tiô khôi vâi krâ nah Việt Nam – Sinuâ, thăm pêi pro rơdêi ƀă pêi pro trâu hơngế tâ tơrŭm cheăng ton xŏn tâi tâng pơla Việt Nam – Sinuâ tung chal nếo, thăm mơnhông hơniâp lĕm, rak tơniăn ƀă mơdêk châ tơƀrê hôm dêi kơpong ƀă tung lâp plâi tơnêi.