Kơxo lơ 15/5, a tíu pêi cheăng xiâm Đảng, Rôh hôp tơdế hneăng Khu pơkuâ ngăn Xiâm Đảng hneăng 13 hiăng châ tơkŭm po xua tơdroăng ki pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng.

Tơpui a rôh pơxiâm po hneăng hôp, pôa Nguyễn Phú Trọng, Kăn xiâm pơkuâ hnê ngăn Đảng tối nhên, Rôh hôp ai pơxúa kal khât ƀă tơdroăng ki pêi pro ƀlêi chiâng tơdroăng pơkâ Hneăng hôp 13 dêi Đảng; cho rôh vâ hvái ngăn, mơnhên tối tiô túa ki tơdrăng tơtro, tâi tâng mâu tơdroăng ki hiăng pêi pro klêi, tơdroăng ki tơƀrê hiăng châ pêi klêi sap ing apoăng hneăng troh nôkố, mơhno tối mâu tơdroăng ki tá hâi pêi pro klêi, ối ‘ro, xiâm kối ƀă ƀai hriâm ki kal; tiô tối tơbleăng tơdroăng cheăng nếo ƀă mâu rôh tơ’lêi hlâu, ƀă xơpá, pơloăng mơnúa ối trâm dêi rơpó; vâ ing mê, pơkâ mâu troăng hơlâ, tơdroăng pơkâ kân kal athế tơkŭm pơkuâ, hnê mơhno pêi pro tung tơdế dêi hneăng 13.

Pôa Nguyễn Phú Trọng, kăn xiâm pơkuâ hnê ngăn Đảng pơkâ thế, Tơnêi têa ƀă mâu vâi pú ki veăng hôp a Rôh hôp mơdêk hiâm mơno, mơdêk hnoăng cheăng pôu râng, tơkŭm hriăn ngăn, tơpui tơno nhên, ăm rơkong veăng tơpui tối vâ pêi klêi hlá mơéa tối tơbleăng séa ngăn dêi tơná ‘na tơdroăng pơkuâ, hnê mơhno dêi Khu xiâm pơkuâ tơdroăng kal kí, Khu pơkuâ ngăn Đảng tơdế hneăng ƀă mâu hnoăng cheăng ki kal troh tâi hneăng cheăng Hneăng hôp 13 dêi Đảng.