VOV4.Xơ Đăng - Hâi lơ 27/9/2022, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng pơkuâ roh hôp Khu pơkuâ hnê ngăn cheăng Đảng séa ngăn, pêi pro hôu khĕn mâu pôa: Tô Anh Dũng, Kăn cheăng tung Khu pơkuâ tơdroăng cheăng Đảng, Ngế xiâm phŏ tơpui kâ; pôa Nguyễn Quang Linh, ngế kum cheăng ăm pôa Phạm Bình Minh, Kăn cheăng tung Khu xiâm kal kí, Ngế pro xiâm phŏ hnê mơhno má môi Chin phuh.

Klêi kơ’nâi tơmâng pơkâ dêi Vi ƀan séa ngăn Tơnêi têa, Khu pơkuâ hnê ngăn cheăng Đảng hlo: Pôa Tô Anh Dũng ƀă pôa Nguyễn Quang Linh hiăng ôh tá pơtâp hriâm ăm lĕm tro tâ, ai tơmiât ôh tá tro ‘na kal kí, hiâm mơno, tơdroăng rêh ối; pro xôi pơkâ tơdroăng dêi Đảng, luât dêi tơnêi têa ‘na hbrâ mơdât kâ kơhveăm liăn ngân, tơdroăng ki ôh tá lĕm tro; pro xôi pơkâ ‘na mâu tơdroăng đảng viên ôh tá chiâng pêi ƀă hnoăng cheăng djâ troăng ahdrối, pro tơdjâk ‘mêi ó, pơlê pơla tô tuăn; pro tơdjâk ‘mêi troh ki loi tơngah dêi khu cheăng Đảng.

Ngăn tiô tơdroăng xiâm, xiâm kối pro xôi; tiô pơkâ dêi Đảng ‘na hôu khĕn đảng viên pro xôi, Khu pơkuâ hnê ngăn cheăng Đảng pơkâ pêi pro hôu khĕn ăm lo ing Đảng ƀă mâu pôa: Tô Anh Dũng, Nguyễn Quang Linh.

VOV/Tơplôu: A Sa Ly