Kơ’nâi 3 chôu kơneăng, a 13 chôu 20 kơxê lơ 30/10 (tiô chôu tơnêi têa pin), Tơƀai chơ pôa Nguyễn Phú Trọng, Kăn xiâm pơkuâ hnê ngăn Đảng ƀă Khu kăn xiâm tơnêi têa Việt Nam hiăng hdrâp a tơraih tơƀai Bắc Kinh, pơxiâm lăm pôu kong têa Sinuâ tiô rơkong krếo thế dêi pôa Tập Cận Bình, Ngế pơkuâ xiâm Đảng Kŏng sản Sinuâ, Kăn xiâm hnê ngăn tơnêi têa. Hneăng lăm pôu khât dêi pôa Nguyễn Phú Trọng, Kăn xiâm pơkuâ hnê ngăn Đảng tiô rơkong krếo thế dêi pôa Tập Cận Bình Kăn xiâm pơkuâ hnê ngăn Đảng po klêi hneăng hôp kân mâu kăn tung lâp tơnêi têa rôh má 20 Đảng Kŏng sản Sinuâ klêi tơniăn, khu kăn ki nếo hiăng tơbleăng inâi ƀă pôa Tập Cận Bình châ rah xo pro Kăn xiâm pơkuâ ngăn Đảng hneăng má 3.

Pôa Nguyễn Phú Trọng, Kăn xiâm pơkuâ hnê ngăn Đảng ƀă pôa Lưu Kiến Siêu  (ối pá hơ-ếo) a tơraih tơƀai

Tơdroăng pôa Nguyễn Phú Trọng cho ngế kăn xiâm kong têa ê ki apoăng lăm pôu Sinuâ ăm hlo ki kal dêi tơdroăng tơrŭm cheăng pơla Sinuâ ƀă Việt Nam xuân môi tiah pơla péa Đảng Kŏng sản Sinuâ ƀă Đảng Kŏng sản Việt Nam. Mơhno troăng hơlâ môi tuăn dêi Việt Nam nhoăm tơrŭm cheăng  ƀă Sinuâ pêi ahdrối tung luât pơkâ tơpui kâ, púi vâ mơnhông mơdêk ton, tơniăn, rế ton rế  tơ ƀrê.

Hâi kố, lơ 31/10, leh tơdah pôa Nguyễn Phú Trọng, Kăn xiâm pơkuâ hnê ngăn Đảng tơkŭm po kân krip a Đại Lễ đường Nhân nhân Bắc Kinh xua pôa Tập Cận Bình, Kăn xiâm pơkuâ hnê ngăn Đảng Kŏng sản Sinuâ, Kăn xiâm hnê ngăn tơnêi têa Sinuâ pơkuâ. Klêi leh tơdah, Kăn xiâm pơkuâ hnê ngăn Đảng péa tơnêi têa hôp tơrá khu kăn xiâm ƀă ăm hlo leh kĭ tơhrâ hên tung hla mơ-éa tơdroăng cheăng pêi ki kal.