Kơxê lơ 21/10, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah pôa António Guterres, Kăn xiâm chêh tôm xo rơkong Khu lâp kong têa. Pôa Nguyễn Phú Trọng hiăng rơtế ƀă Kăn xiâm chêh tôm xo rơkong Khu lâp kong têa tơpui tơno ‘na khôi túa vâi krâ nah mơnhông mơdêk, túa lĕm tro dêi tơnêi têa Việt Nam ƀă mâu tơdroăng ki lĕm ‘na rêh ối dêi kuăn mơngế Việt Nam; tơpui ‘na mâu tơdroăng châ tơƀrê tŭm túa Việt Nam hiăng châ tung 35 hơnăm pơ’lêh nếo, mâu tơdroăng châ tơƀrê tung mâu hơnăm achê kố tung hbrâ ví mơdât pơreăng COVID-19, rak tơniăn cheăng kâ châ tơtêk hên, tơniăn tơdroăng rêh ối pơlê pơla.

Pôa Nguyễn Phú Trọng, Kăn xiâm pơkuâ hnê ngăn Đảng tơdah Kăn xiâm chêh tôm xo rơkong Khu lâp kong têa

Pôa Nguyễn Phú Trọng mơnhên, Việt Nam môi tuăn sap apoăng troh tá tui lui troăng hơlâ tơpui kâ tơniăn krê, pơkuâ dêi hnoăng cheăng, hơniâp lĕm, tơrŭm cheăng ƀă mơnhông mơdêk, hên troăng tơrŭm cheăng tơpui kâ ƀă kong têa ê; cho khu tơrŭm ki ai pơxúa tung pơlê pơla lâp plâi tơnêi.