VOV4.Xơ Đăng - Hâi lơ 13/9, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah pôa Samdech Heng Samrin, Kăn xiâm hnê ngăn ki loi tơngah Đảng Nhân yân Kul (CPP), Kăn xiâm hnê ngăn Kuô̆k hô̆i kong têa Kul dế ai roh lăm pôu pêi cheăng Việt Nam. A roh tơdah, pôa Nguyễn Phú Trọng mơnhên tối, tơrŭm cheăng pơla péa Đảng, péa tơnêi têa ƀă kuăn pơlê péa tơnêi têa rế hía rế mơnhông mơdêk trâu hơngế, pơxúa păng ‘nâng ƀă châ tơƀrê, djâ tơƀrê ăm kuăn pơlê rêm kong têa.

Pôa Nguyễn Phú Trọng, Kăn xiâm pơkuâ hnê ngăn Đảng tơdah Kăn xiâm hnê ngăn Kuô̆k hô̆i kong têa Kul

Pôa Nguyễn Phú Trọng mơnhên tối, Đảng, Tơnêi têa ƀă kuăn pơlê Việt Nam đi đo môi tuăn roh mơjiâng ƀă mơnhông mơdêk tơnêi têa Kul, mơnê tơdroăng môi tuăn, tŏng kum kơnía git ki kong têa Kul hiăng ăm Việt Nam sap ing hdrối nah troh nôkố. Kăn xiâm pơkuâ hnê ngăn Đảng tối rơdêi khôi túa vâi krâ nah ƀă ki kal dêi tơrŭm cheăng pơla pái kong têa Việt Nam – Lếo – Kul ƀă pói vâ pái kong têa rơtế dêi pó rak kring, thăm rak tơniăn ăm tơrŭm cheăng pơla pái kong têa rế hía rế mơnhông mơdêk, xua tơdroăng mơnhông dêi rêm kong têa, xua hơniâp lĕm, tơniăn, tơrŭm ƀă mơnhông mơdêk a kơpong ƀă lâp plâi tơnêi.

A Sa Ly tơplôu ƀă tơbleăng