Kơxê hâi lơ 23/6, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah pôa Yoon Suk-yeol, Kăn xiâm pơkuâ ngăn kong têa Hàn Quốc, tung hneăng lăm pôu râ kăn xiâm troh a tơnêi têa Việt Nam. Pôa Nguyễn Phú Trọng loi tơngah, hneăng lăm pôu kô mơjiâng troăng hơlâ ki nếo, thăm mơedêk tơrŭm pơla peá pâ pơtối mơnhông lĕm tro tâ nếo, ƀă hnoăng cheăng a’ngêi tâ, trâu rơdâ tâ ƀă dâi khât tâ tung la ngiâ.

Pôa Nguyễn Phú Trọng tối nhên, tơrŭm cheăng pơla péa pâ tơnêi têa hiăng châ pơloăng mơnúa hên tung khế hơnăm hdrối mê hía nah, ƀă pói tơngah rế hía rế tơtêk mơnhông ki lĕm tro, xua ing tơdroăng ki ai pơxúa ăm tơná kuăn pơlê dêi 2 kong têa.

Kăn xiâm pơkuâ kong têa Hàn Quốc pâ thế, péa pâ kal tŏng kum, hnê mơjiâng khu rơxông nếo pơla péa pâ tơnêi têa; Hàn Quốc kô pơtối kơjo kum hnê mơjiâng sinh viên Việt Nam, tŏng kum tơ’lêi hlâu vâ sinh viên Việt Nam châ mot hriâm a mâu hngêi trung kŏng ngê̆ chal nếo dêi Hàn Quốc, ing mê, thăm pro tíu ki tơrŭm krá khâp ăm tơrŭm cheăng pơla péa pâ tơnêi têa; pâ thế péa pâ thăm rế tơrŭm tung po hneăng trâm mâ pơla kuăn pơlê, thăm mơdêk tơrŭm tung kơvâ hnê hriâm ƀă hnê mơjiâng tuăn ngôa rơkê, khoa hok kŏng ngê̆, mơdêk tơrŭm pơla Hàn Quốc ƀă Việt Nam chiâng um méa túa ki lĕm tro tung tơrŭm cheăng lâp plâi tơnêi, péa kong têa rơtế mơ-eăm mơdêk hên tâ nếo, xua vâ rak vế tơdroăng hơniâp lĕm, tơrŭm cheăng ƀă pro kro mơdrŏng.