VOV4.Xơ Đăng - Kơxê lơ 17/10, a tíu pêi cheăng xiâm Đảng, Pôa Nguyễn Phú Trọng, Kăn xiâm pơkuâ hnê ngăn Đảng tơdah kăn xiâm pơkuâ kong têa Singapore jâ Halimah Yacob ƀă Khu kăn xiâm kong têa Singapore drêng rôh lăm pôu râ kăn xiâm Tơnêi têa Việt Nam. A rôh trâm mâ, pôa Nguyễn Phú Trọng tối Việt Nam nhoăm khât tơdroăng tơrŭm cheăng ƀă Singapore, pâ thế péa tơnêi têa pơtối rak vế tơdroăng cheăng pêi ki tơƀrê tung tơrŭm cheăng ki kân ing thăm mơdêk tơpui tơno, trâm mâ mâu kăn xiâm ƀă rêm râ tung tâi tâng mâu ƀâng dêi Đảng, Chin phuh, Kuô̆k hô̆i ƀă kuăn pơlê; mơdêk ki tơƀrê ‘na cheăng kâ klêi kơ’nâi ai pơreăng tâ tú kân.

Pôa Nguyễn Phú Trọng, Kăn xiâm pơkuâ hnê ngăn Đảng tơdah Kăn xiâm pơkuâ kong têa Singapore

Pôa Nguyên Phú Trọng, kăn xiâm pơkuâ hnê ngăn Đảng pơcháu mâu kơ koan tơrŭm cheăng dêi Việt Nam tơrŭm krá ƀă kong têa Singapore vâ mơhno ki tơtro mâu tơdroăng tơhrâ châ pêi rơhéa tung rôh kăn xiâm pơkuâ kong têa lăm pôu, xua vâ pro pơxúa dêi kuăn pơlê péa tơnêi têa.

VOV/Tơplôu: Gương