Pôa Say Chhum tối phiu ro lăm pôu pêi cheăng Việt Nam tung hơnăm tơrŭm nhŏng o Việt Nam – Kul, mơnê pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah ƀă ăm Khu râ kăn kong têa Kul mâu tơdroăng tuăn pâ nhŏng o. Pôa mơnhên tối, kong têa Kul kô rơtế ƀă Việt Nam gâk kring, pơtối pêi ƀă hnê ăm mâu rơxông kơ’nâi tơrŭm cheăng lĕm tro kố xuân môi tiah tơrŭm pơla pái Đảng, pá kong têa Kul – Việt Nam – Lếo.

Pôa Nguyễn Phú Trọng, Kăn xiâm pơkuâ hnê ngăn Đảng tơdah pôa Say Chhum, Kăn xiâm hnê ngăn Kuô̆k hô̆i râ má môi kong têa Kul

Pôa Say Chhum hiăng tơbleăng tối ƀă pôa Nguyễn Phú Trọng ‘na tơdroăng châ tơƀrê roh hneăng hôp tơpui tơno ƀă pôa Vương Đình Huê, Kăn xiâm hnê ngăn Kuô̆k hô̆i, tơdroăng kong têa Kul achê kố. Pôa Nguyễn Phú Trọng kheăn kơdeăn ki kơnâ ƀă mâu tơdroăng châ tơƀrê roh lăm pôu pêi cheăng dêi pôa Say Chhum, mơnhên tơrŭm cheăng pơla péa tơnêi têa xuân môi tiah pái kong têa Việt Nam - Lếo – Kul kum kal khât kum rêm kong têa mơnhông mơdêk hên troăng, kuăn pơlê ai tơdroăng rêh ối phâi hơtô, hơniâp ro.

Tâi tâng a roh trâm mâ

Pôa Nguyễn Phú Trọng tơpui tơno ‘na mâu troăng kân vâ thăm tơrŭm cheăng pơla péa tơnêi têa tung la ngiâ, ki rơhêng vâ tối cho mâu troăng trâm mâ khu râ kăn xiâm pơla péa Đảng, Chin phuh, Kuô̆k hô̆i, khu xiâm, kơvâ, mâu râ cheăng, kong pơlê ƀă hnê mơhno, hnê ăm rơxông ối nếo khôi túa vâi krâ nah tơrŭm pơla Việt Nam – Kul.