Kơmăng lơ 21/12, a tíu pêi cheăng xiâm Đảng, pôa Nguyễn Phú Trọng, kăn xiâm pơkuâ hnê ngăn Đảng hiăng tơpui phôn ƀă pôa Miguel Díaz-Canel, kăn xiâm pơkuâ hnê ngăn Đảng má môi Đảng Kŏng san Cuba. A rôh tơpui phôn, péa ngế kăn pơkuâ tối nhên tơrŭm cheăng, tơrŭm tơroâ, djâ troăng ahdrối pơla péa Đảng, péa tơnei têa xua Hồ Chí Minh prế kăn pơkuâ Fidel tơbêng; tơpui tơno mâu túa pơkâ vâ mơdêk tơrŭm cheăng pơla péa pâ tung la ngiâ.

Môi tuăn thăm mơdêk hlê plĕng, kum dêi rơpó, rak vế pơtroh mâu khu râ kăn ƀă rêm râ; pơtối tơpui tơno tơdroăng tơpui leăng, tơdroăng ki rơkê; tơbleăng tơƀrê mâu tơkêa tơrŭm cheăng tung kơvâ ki ai ivá rơdêi ƀă tơdroăng ki rơhêng vâ tung pêi chiâk deăng, khăm pơlât; mơdêk tơrŭm, môi tuăn tŏng kum dêi rơpó a mâu rôh hôp kong têa ê. Pôa Díaz-Canel tối rơhêng vâ mâu khu mơdró kâ Việt Nam thăm mơdêk ‘no liăn cheăng a mâu tơdroăng tơkêa a Cuba, malối cho tung mâu kơvâ mơjiâng bro kế kâ, kế tơmeăm xúa, tê mơdró kế tơmeăm ‘ngré.