VOV4.Xơ Đăng - Kơxê lơ 25/8, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng tơpui phôn ƀă pôa Joko Widodo, Kăn xiâm pơkuâ kong têa Indonesia. Pôa Nguyễn Phú Trọng hiăng rơkâu Kăn xiâm pơkuâ kong têa Indonesia ‘na mâu tơdroăng châ tơƀrê kân, hên tơdroăng dêi Indonesia, tung mê ai tơdroăng hbrâ mơdât pơreăng COVID-19, rak  tơniăn mơnhông mơdêk cheăng kâ, mâu tơdroăng tơpui kâ ƀă kong têa ê dêi Indonesia ƀă mâu tơdroăng mơ-eăm tung tơdroăng pôu râng hnoăng cheăng cho Kăn xiâm hnê ngăn G20 hơnăm 2022.

Tâi tâng roh tơpui tơno khu râ kăn xiâm dêi pôa Nguyễn Phú Trọng, Kăn xiâm pơkuâ hnê ngăn Đảng

Tung pơla péa tơnêi têa mot hneăng mơnhông mơdêk nếo, pôa Nguyễn Phú Trọng tối mâu troăng prôk kân vâ tơrŭm cheăng péa tơnêi têa mơnhông mơdêk ó rơdêi ƀă hôm tâ mê nếo. Kăn xiâm pơkuâ hnê ngăn Đảng pơkâ thế thăm hlê plĕng dêi pó, loi tơngah kal kí ing trâm mâ ƀă trâm mâ khu râ kăn xiâm, pêi pro mâu tơdroăng môi tuăn, mơnhông mơdêk mâu troăng pơkâ pêi ƀă thăm tơrŭm cheăng tung kơvâ cheăng lêng – gâk kring. Kăn xiâm pơkuâ hnê ngăn Đảng xuân pơkâ thế péa pâ thăm tơrŭm cheăng kâ, tơrŭm krá tơniăn tung mâu tơdroăng kơpong, lâp plâi tơnêi, tung mê, ai tơdroăng têa kơxĭ Biển Đông ƀă tơrŭm cheăng a ASEAN xuân môi tiah a mâu hneăng hôp tơpui tơno lâp plâi tơnêi ki ê.

A Sa Ly tơplôu ƀă tơbleăng