VOV4.Xơ Đăng - Pêi pro tiô Tơdroăng trâm mâ kuăn pơlê hdrối roh hôp má 4 Kuô̆k hô̆i hneăng 15, pôa Nguyễn Phú Trọng, Kăn xiâm pơkuâ hnê ngăn Đảng nếo ai rôh trâm mâ kuăn pơlê a 3 pơlê krâm Đống Đa, Ba Đình, Hai Bà Trưng, Pơlê kong kân Hà Nội. Ai kơdrâm kuăn pơlê a 3 pơlê kân tối nhên tơdroăng cheăng dêi khu hnê mơhno xiâm tơnêi têa ‘na hbrâ mơdât kâ kơluâ, pro ôh tá tro ƀă hên hĕng mâu tơdroăng ki ê... xua pôa Nguyễn Phú Trọng, Kăn xiâm pơkuâ hnê ngăn Đảng pro ngế xiâm pơkuâ hnê mơhno, tung pơla hdrối kố nah mâu kơ koan ngăn ‘na luât hiăng pêi kơtăng, tơleăng mơnhên mâu tơdroăng kâ kơluâ, mâu tơdroăng ki pro ôh tá tro.

Pôa Nguyễn Phú Trọng, Kăn xiâm pơkuâ hnê ngăn Đảng trâm mâ kuăn pơlê a Pơlê kong kân Hà Nội

Pakĭng mê, mâu kơ koan dêi Kuô̆k hô̆i, Chin phuh xuân hiăng tơleăng mơnhên teăm tơdrêng tro tiô luât. Teăng mâ khu kăn seá ngăn ‘na luât Hà Nội, pôa Nguyễn Phú Trọng nhoăm pơtối tơmâng xo mâu tơdroăng, tro tá hiâm mơno ƀă ai hnoăng cheăng pêi ƀă kuăn pơlê. Rôh kố, kăn xiâm pơkuâ hnê ngăn Đảng tối púi vâ Đảng bô̆, mâu kăn ƀă kuăn pơlê dêi Pơlê kong xiâm Hà Nội mơ-eăm mơnhông mơdêk rơdêi, rế ton rế mơdêk ki rơdêi ăm pơlê kong xiâm dêi tơnêi têa Việt Nam ôh tá thu kơ mâu pơlê kong xiâm ki ê tung lâp plâi tơnêi.

VOV/Tơplôu: Gương