VOV4.Xơ Đăng - Kơxo lơ 18/7, pôa Nguyễn Phú Trọng, Kăn xiâm pơkuâ hnê ngăn Đảng veăng ƀă xông tơpui a Leh tơbâ 60 hơnăm Hâi mơjiâng tơrŭm tơpui kâ a hâi lơ 5/9, ƀă 45 hơnăm Hâi kĭ tơkêa Tuăn pâ dêi pó ƀă Tơrŭm Việt Nam – Lếo (18/7), Hơnăm rŭm môi tuăn, tuăn pâ Việt Nam – Lếo, Lếo – Việt Nam 2022 châ tơkŭm po kân krip a pơlê kong xiâm Hà Nội. Rơtế veăng ai mâu kăn pơkuâ, kăn xiâm pơkuâ Đảng, Tơnêi têa ƀă pôa Bounthong Chitmany, Kăn cheăng tung khu xiâm kal kí, Kăn xiâm hnê mơhno má môi tơdroăng cheăng Đảng kong têa Lếo, Kăn xiâm phŏ hnê ngăn kong têa Lếo pơkuâ djâ Khu râ kăn teăng mâ râ kăn xiâm dêi Đảng,

Pôa Nguyễn Phú Trọng, Kăn xiâm pơkuâ hnê ngăn Đảng veăng leh tơbâ 60 hơnăm mơjiâng tơrŭm tơpui kâ Việt Nam – Lếo

Tơnêi têa Lếo troh veăng leh. Xông tơpui a roh leh, pôa Nguyễn Phú Trọng, Kăn xiâm pơkuâ hnê ngăn Đảng mơnhên péa tơnêi têa achê dêi pó, xah ƀă dêi pó, rơtế ôu tơdjuôm têa kroăng Mekong, rơtế hgiân kơxah a ngo Trường Sơn ó rơdêi, Việt Nam ƀă Lếo ai khôi túa rŭm tơpui tơno ƀă dêi pó, achê ƀă dêi pó plâ rơxông mơnhông mơdêk tơnêi têa ƀă rak tơnêi têa dêi péa hdroâng mơngế.

Tâ tá rôh leh

Péa Đảng, péa tơnêi têa ƀă kuăn pơlê péa tơnêi têa thăm rế thế rŭm môi tuăn, achê dêi pó, thăm tơrŭm tâ mê nếo vâ rơtế dêi pó tơkâ hluâ pá puât, pơtối rak krá chân pơkâ pêi troh tơniăn krê hdroâng mơngế ƀă chuh ngiah pơlê pơla; rơtế dêi pó pêi tâi ivá tơná vâ gak kring ƀă đi đo pro ăm tơrŭm cheăng kân kĭn, tơrŭm ki phá tơ-ê ƀă tơrŭm tŭm têk Việt Nam – Lếo.

A Sa Ly tơplôu ƀă tơbleăng