VOV4.Xơ Đăng - Hâi lơ 30/9, a Tíu xiâm pơkuâ hnê ngăn Đảng, pôa Nguyễn Phú Trọng, kăn xiâm pơkuâ hnê ngăn Đảng hiăng pơkuâ xiâm Khu xiâm ngăn ‘na cheăng kal kí vâ séa mơnhên, hôu tối pôa Bùi Nhật Quang, Ngế cheăng tung tíu xiâm Đảng, Ngế cheăng tung Khu xiâm pơkuâ ngăn Đảng ƀô̆ Khu mâu kơ koan tơnêi têa tơnêi, cho Kăn pơkuâ hnê ngăn Đảng uỷ, Kăn xiâm hnê ngăn Viện Hàn Lâm Khoa học Xã hội Việt Nam.

Klêi kơ’nâi séa mơnhên ngăn tơdroăng pơkâ thế dêi Vi ƀan Séa ngăn tíu xiâm Đảng, Khu xiâm ngăn cheăng kal kí tối ăm nhên: Tơdroăng pro xôi, pêi pro ôh tá tro dêi pôa Bùi Nhật Quang hiăng kân ó khât, pro ôh tá tơrŭm tung khu pơkuâ cheăng, pro chiâng ai tơdroăng tơhôu tơhêng tung khu kăn ƀô̆, đảng viên, pro tơdjâk ‘mêi hnoăng cheăng dêi Khu pơkuâ hnê ngăn Đảng, Viện Hàn lâm Khoa học xã hội Việt Nam ƀă tơdjâk troh tơná pôa.

Pôa Bùi Nhật Quang-Ngế cheăng tung tíu xiâm Đảng

Séa ngăn tiô kơ tơdroăng, ki tơtro khât, kơlo ki hên iâ, ki ôh tá rơhéa, ki xiâm dêi tơdroăng pro xôi, ngăn tiô kơ tơdroăng pơkâ dêi Đảng ‘na hôu tối đảng viên pro xôi, Khu xiâm ngăn cheăng kal kí pơkâ xo hnoăng ki vâ hôu tối pôa Bùi Nhật Quang, pơkâ thế mâu kơ koan séa mơnhên ngăn ‘na tơdroăng ki hôu tối kơ pôa Bùi Nhật Quang tơdrêng amê teăm vâ hôu tơdrêng ‘na hnoăng cheăng Đảng.

VOV/Tơplôu: Nhat Lisa