Kơxo hâi lơ 16/6/2023, a Khu xiâm pơkuâ ngăn Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng pơkuâ xiâm roh hôp Khu xiâm kal kí, Khu xiâm hnê mơhno ăm mâu kăn tơpui tối ‘na Tơdroăng tơkêa pêi mơgêi 20 hơnăm hâi rak vế, pêi pro tơdroăng pơkâ kơxô̆ 23-NQ/TW, hâi lơ 12/3/2003 dêi Khu xiâm pơkuâ hnê ngăn Đảng hneăng IX ‘na pơtối mơdêk tơdroăng ivá dêi tơdroăng tơrŭm tâi tâng hdroâng kuăn ngo, xua ing tơdroăng vâ kum kuăn pơlê mơ-eăm cheăng kâ, pro kro, tơnêi têa xông tơtêk, ó rơdêi, pơlê pơla ai tơdroăng rêh ối tơdâng tơ’mô, pêi pro tiô tuăn hiâm kuăn pơlê pói rơhêng vâ, mơhno túa lĕm tro.

Klêi kơ’nâi châ tơmâng Kơ koan dêi Khu xiâm hnê mơhno mơjiâng tơdroăng tơkêa bro tối tơbleăng ‘na tơdroăng tơkêa pêi, Khu xiâm ngăn ‘na cheăng kal kí hiăng tơpui tơno, vâ môi tuăn mơnhên ngăn: Tung mâu hơnăm hdrối mê hía nah, ivá ki tơrŭm cheăng tâi tâng hdroâng kuăn ngo ôh tá la lâi tro pơtê, thăm mơdêk ƀă mơnhông, veăng kum thăm mơdêk mơnhông pêi cheăng kâ-rêh ối pơlê pơla, kring vế tơnêi têa, gak ngăn tơniăn, tơrŭm tơpui kâ ƀă kong têa ê tơtro, rak ngăn tơdroăng rêh kâ ối, pêi cheăng kuăn pơlê, mơnhông tơdroăng loi tơngah dêi kuăn pơlê ƀă Đảng, Tơnêi têa. Hnoăng cheăng mơjiâng, ‘mâi rơnêu pât Đảng ƀă khu xiâm ngăn cheăng kal kí châ pơkâ pêi pro krâu khât.

A roh hôp, Khu xiâm ngăn ‘na cheăng kal kí xuân vêh mơnhên: Tơdroăng tơrŭm tâi tâng khu hdroâng kuăn ngo cho hnoăng cheăng ki kal git, cho troăng hơlâ ki ton xŏn, pêi pro đi đo dêi Đảng, cho ivá ki xiâm vâ pơkâ mâu tơdroăng ƀlê trâng tung hnoăng mơjiâng ƀă kring vế Tơnêi têa. Tơrŭm pơla khu hdroâng mơngế tung lâp tơnêi têa pơtối mơdêk tơdroăng ki pêi pro tiô hiâm mơno kuăn pơlê pói vâ, mơnê nhoăm hnoăng cheăng kuăn mơngế, hnoăng pơkuâ ngăn, rak vế pêi pro tro tiô kuăn pơlê pói rơhêng vâ.