Hâi lơ 23/10, a tíu pêi cheăng xiâm Đảng, Khu xiâm kal kí, Kăn hnê ngăn tơkŭm po hôp tâi tâng tung lâp tơnêi têa mơ’no tiô troăng hyôh Internet  tơkŭm hnê tối ƀă tối tơbleăng pơkâ 24 dêi Khu xiâm kal kí hneăng 13 ‘na mơnhông cheăng kâ rêh ối, rak tơniăn cheăng lêng kơpong Đông Nam Bộ troh hơnăm 2030 hbrâ rơnáu mâu tơdroăng vâ pêi troh hơnăm 2045.

Pôa Nguyẽn Phú Trọng, Kăn xiâm pơkuâ hnê ngăn Đảng ai ƀai pơchuât tơbleăng hnê mơhno ki kal a hneăng hôp kơpong Đông Nam Bộ tá Pơlê kong kân Hồ Chí Minh ƀă 5 to kong pơlê dêi râ xiâm tơnêi têa: Tây Ninh, Bình Phước, Bình Dương, Đồng Nai, Bà Rịa - Vũng Tàu. Cho kơpong ai tíu, hnoăng cheăng pêi ki kal tung mơnhông cheăng kâ - rêh ối, rak tơniăn ‘na cheăng lêng, kring tơniăn ƀă tơpui kâ dêi tơnêi têa.

Tâ tá hneăng hôp

Tơbleăng hnê mơhno a hneăng hôp, pôa Nguyễn Phú Trọng loi khât: khu râ Đảng, mâu kăn ƀă kuăn pơlê mâu kong pơlê tung kơpong Đông Nam Bộ kô pơtối rak vế ki rơdêi tâ nếo ‘na cheăng kâ hơ’lêh nếo, râk vế pêi pro tơdroăng ki lĕm tro dêi kăch măng ton nah, khên tơnôu ƀă ai tuăn lĕm kơnía, rơkê plĕng, hriăn plĕng ki nếo, ai tuăn hơ-ui kơ mơngế dêi mơngế ối peăng Mâ hâi lo ‘na hdroh.

Tơdrêng ƀă mâu khu râ kơvâ cheăng, khu xiâm, kơvâ cheăng xiâm ƀă mâu râ Đảng ủy, mâu kăn rêm râ tung lâp tơnêi têa, mơ-eăm tâ nếo, khŏm mơ-eăm pê klêi tơdroăng Pơkâ dêi Khu xiâm kal kí rôh kố, pro xiâm ki pơ’lêh nếo, tơƀrê tung tơdroăng mơnhông cheăng kâ - rêh ối ƀă tơniăn chêng lêng - kring tơniăn kơpong Đông Nam Bộ.