Kơxê hâi lơ 25/5, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hôp ƀă Kăn xiâm hnê ngăn Đảng kong têa Rusi, pôa Dmitry Medvedev dế pôu pêi cheăng a Việt Nam sap hâi lơ 21 ta troh hâi lơ 23/5/2023 tiô tơdroăng tơhrâ tơrŭm cheăng pơla Đảng Kŏng sản Việt Nam ƀă Đảng “Tơnêi têa Rusi Môi tuăn’’.

A rôh hôp, tơpui tơno, péa ngế kăn tối phiu ro ‘na tơrŭm cheăng tiah hmâ ton nah ki lĕm ƀă tơrŭm tung tâi tâng tơdroăng pơla péa tơnêi têa ƀă tơrŭm krá pơla péa Đảng ing tơdroăng nhoăm loi dêi rơpó ‘na tơdroăng kal, mơhno ing mâu rôh tơpui tơno tơrá péa tơnêi têa, péa Đảng.

Tối nhên, Việt Nam đi đo nhoăm tơdroăng veăng kum, ki kơnía git dêi kuăn pơlê Liên Xô ƀă kuăn pơlê Rusi nhŏng o, Kăn xiâm pơkuâ hnê ngăn Đảng tối tung luât pơkâ tơpui kâ dêi tơná, Việt Nam nhoăm tơrŭm cheăng tiah hmâ ton nah, Tơrŭm tung tŭm tơdroăng ƀă Rusi, Đảng Kŏng sản Việt Nam ngăn tơdroăng mơnhông tơrŭm cheăng ƀă mâu Đảng a Rusi, tung mê, ai Đảng “Tơnêi têa Rusi tơrŭm môi tuăn’’, pro xiâm ki kal ăm tơdroăng tơrŭm ton xŏn ƀă krá rơdêi pơla péa tơnêi têa.