Kơxê hâi lơ 4/6, a tíu pêi cheăng xiâm Đảng, pôa Nguyễn Phú Trọng - Kăn xiâm pơkuâ ngăn Đảng tơdah pôa Anthony Albanese, Kăn xiâm ngăn Công đảng, Ngế pro xiâm hnê ngăn kong têa Australia lăm pôu Việt Nam. Pôa Nguyễn Phú Trọng, Kăn xiâm pơkuâ hnê ngăn Đảng tối ki nhoăm dêi Việt Nam ƀă tơdroăng tơrŭm cheăng pơla Việt Nam - Australia, khĕn kơdeăn ki mơnhông rơdêi, ki khât ƀă tâi tâng tung tơdroăng tơrŭm cheăng pơla péa pâ tung mâu hơnăm hdrối mê hía nah.

Kăn xiâm pơkuâ hnê ngăn Đảng tối nhên, Việt Nam ƀă Australia cho péa tơnêi têa rơtế a kơpong châu Á - Thái Bình Dương, ai hên tơdroăng ki vâ môi tiah dêi rơpó, tơdroăng tơrŭm hiăng luâ hên rơxông mơnhông tơƀrê tung 50 hơnăm hdrối, châ po rơdâ ƀă pêi cheăng trâu khât tá tung tơrŭm cheăng kal kí ‘na cheăng kâ, khoa hok, kơmăi kơmok, hnê hriâm ƀă hnê mơjiâng tuăn ngôa rơkê ƀă cheăng lêng, kring vế tơniăn.

Kăn xiâm pơkuâ hnê ngăn Đảng tối vâ môi tuăn ‘na mâu troăng pêi mơnhông tơrŭm cheăng, tung mê ai tơdroăng chông djâ 2 tơnêi têa xông tơƀrê nếo, tơrŭm krá tâ nếo ƀă mơdêk tơƀrê tung pêi pro mâu tơdroăng tơhrâ xua vâ pro pơxúa dêi kuăn pơlê péa tơnêi têa, xua vâ pro hơniâp lĕm, tơrŭm ƀă mơnhông mơdêk a kơpong ƀă tung lâp plâi tơnêi.