Kơxê hâi lơ 5/6 a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng ai rôh trâm mâ va achê 150 ngế kăn kơdrâi Kuô̆k hô̆i hneăng 15.  Tơpui ƀă mâu kăn Kuô̆k hô̆i kơdrâi, pôa Nguyễn Phú Trọng - Kăn xiâm pơkuâ hnê ngăn Đảng tối nhên, tơdroăng cheăng pơ’lêh nếo, cheăng ƀă kơmăi kơmok tiô túa nếo nôkố, mơjiâng ƀă kring vế tơnêi têa tung rơxông nếo dế pơkâ hên ƀă tâi tâng Đảng, tâi tâng kuăn pơlê, tâi tâng khu xiâm cheăng kal kí dêi tơnêi têa pin.

Tung mê, ai hnoăng pêi ki kân dêi Kuô̆k hô̆i, dêi mâu kăn Kuô̆k hô̆i, mâu kăn Kuô̆k hô̆i kơdrâi. Ing tơdroăng ki mê, pôa Nguyễn Phú Trọng - Kăn xiâm pơkuâ ngăn Đảng tối pơchân, tung la ngiâ mâu kăn Kuô̆k hô̆i kơdrâi kal pơtối rak vế pêi pro tơdroăng cheăng khên tơnôu, ki dâi lĕm dêi vâi kơdrâi Việt Nam, pêi cheăng tâi hiâm mơno, tâi ivá xua vâ pro pơxúa dêi tơnêi têa, dêi hdroâng mơngế, xua tơdroăng rêh ối hơniâp ro dêi kuăn pơlê; pêi tro tâ nếo hnoăng cheăng dêi mâu kăn ƀă kuăn pơlê; pơtối rak vế hnoăng cheăng tơná tung mơjiâng, pê klêi tro tiô luât (tung mê, ai luât pơkâ ôh tá pơrah pơla kơdrâi ƀă kơnốu), séa ngăn nhên ƀă pơkâ mâu tơdroăng ki kal dêi tơnêi têa tung tơdroăng cheăng dêi Kuô̆k hô̆i.