Kơxo hâi lơ 15/6 a Hà Nội, pôa Nguyễn Phú Trọng - Kăn xiâm pơkuâ hnê ngăn Đảng hiăng troh veăng hôp ƀă hnê mơhno hneăng Hôp Đảng ủy Kŏng an xiâm tơnêi têa 6 khế apoăng hơnăm 2023. Tơbleăng hnê mơhno a Hneăng hôp, pôa Nguyễn Phú Trong pơkâ thế Đảng ủy kŏng an xiâm tơnêi têa, Khu xiâm kŏng an pơtối rak vế pêi pro hnoăng cheăng xiâm tơbleăng Pơkâ kơxô̆ 12 dêi Khu xiâm kal kí ‘na mơdêk rơdêi mơjiâng khu lêng kŏng an kuăn pơlê krúa, rơdêi,  rơkê ƀeăn, pêi rơkê tiô túa nếo, pêi tơdroăng cheăng tro tiô pơkâ, tơdroăng cheăng pêi ki kal tung tơdroăng nếo nôkố.

Klêi mê, tơrŭm krá khât ƀă Đảng khu kăn Kuô̆k hô̆i, Khu kăn pơkuâ hnê ngăn Đảng Chin phuh, mâu kăn pơkuâ hnê ngăn Đảng kong pơlê tơbleăng tơdroăng Pơkâ kơxô̆ 12 ƀă mâu pơkâ dêi hneăng Hôp Tíu xiâm ‘na mơnhông cheăng kâ-rêh ối ƀă tơniăn cheăng lêng troh hơnăm 2030, hvái ngăn troh hơnăm 2045 dêi tơdrốu Kơpong cheăng kâ tung lâp tơnêi têa châ xúa tung rêh ối.

Pôa Nguyễn Phú Trọng pơkâ thế, Đảng ủy Kŏng an Xiâm tơnêi têa mơ-eăm mơjiâng khu lêng kŏng an kuăn pơlê krúa, rơdêi, kơhnâ ƀeăn, pêi cheăng rơkê tiô túa nếo, ing tơdroăng “bú ‘nâi ối to Đảng cho ối tơná”, “Inâi ô eăng cho tơdroăng ki tĭng, ki kơnía má môi”.