Pôa Nguyễn Phú Trọng, Kăn xiâm pơkuâ hnê ngăn Đảng nếo trâm mâ kuăn pơlê mâu pơlê krâm Đống Đa, Ba Đình, Hai Bà Trưng, Pơlê kong kân Hà Nội vâ tơbleăng klêi kơ’nâi hneăng hôp pơla hdrối kố nah ƀă tơdah xo mâu rơpui tơpui tối pâ thế dêi kuăn pơlê. Pôa Nguyễn Phú Trọng mơnê mâu rơxông kuăn pơlê hiăng đi đo tơmâng ngăn ƀă séa ngăn khât tơdroăng cheăng dêi Kuô̆k hô̆i, tung mê ai Hneăng hôp má 5 pơla hdrối kố nah.

Pôa Nguyễn Phú Trọng tối nhên Hà Nội cho pơlê kong xiâm, cho tíu xiâm ‘na tơdroăng kal kí, tíu xiâm mơhno túa lĕm tro dêi lâp tơnêi têa. Xua mê, mơngế Hà Nội athế mơdêk khôi hmâ tơdrăng lĕm, têm rơpiât, mơhnŏng pleăng ƀă khên tơnôu, kal tơkŭm mơjiâng tơdroăng mơhno túa lĕm tro, mơjiâng kuăn mơngế, mơjiâng tơdroăng ki hơniâp, tơniăn lĕm.

Pôa Nguyễn Phú Trọng, Kăn xiâm pơkuâ hnê ngăn Đảng pơkâ thế rêm râ, mâu kơvâ cheăng dêi pơlê kong kân Hà Nội pơkâ kơtăng mâu tơdroăng ki xiâm kố, xúa tung tơdroăng ki ai khât vâ mơjiâng Pơlê kong xiâm tơxâng cho Pơlê kong xiâm rơpâu hơnăm pleăng hnoăng, khên tơnôu, tơdrăng, têm rơpiât, Pơlê kong xiâm dêi hiâm mơno ƀă ‘na kuăn mơngế ƀă hên inâi ki ê.