A rôh trâm mâ kuăn pơlê, khu kăn Kuô̆k hô̆i kong pơlê Lâm Đồng hiăng tơbleăng ăm kuăn pơlê ‘na tơdroăng dêi Rôh hôp ôh tá xê tiah hmâ rôh má Môi ƀă mâu tơdroăng kal, tơdroăng rôh hôp má 2, Kuô̆k hô̆i hneăng 16; tơdroăng hiăng pêi pêi pro mâu tơdroăng pâ thế dêi kuăn pơlê ing mâu rôh trâm mâ a ngiâ mâu kơ koan râ kơpêng.

Tơpui ƀă kuăn pơlê bêng Lâm Viên - Đà Lạt, pôa Nguyễn Văn Quảng Kăn tơleăng Hngêi tơleăng Kuăn pơlê tiâ tơdrêng tâi tâng mâu tơdroăng kuăn pơlê êng, pâ thế. Hlối tối, mâu tơdroăng pâ thế dêi kuăn pơlê kô châ chêh tơkŭm tŭm vâ pơtroh ăm râ kơpêng ki ai hnoăng cheăng tiâ mơnhên, ƀă malối Kuô̆k hô̆i xuân séa ngăn tơdroăng mê.