Tung rôh lăm pôu râ kăn xiâm tơnêi têa troh Hàn Quốc, hâi lơ 5/12, a Seoul, pôa Nguyễn Xuân Phúc, Kăn xiâm hnê ngăn tơnêi têa hiăng hôp tơpui tơno ƀă hlối hôp ƀă pôa Yoon Seok Yeol, Kăn xiâm pơkuâ kong têa Hàn Quốc. Tối tơbleăng a rôh hôp, tơpui tơno, pôa Yoon Seok Yeol tối, Hàn Quốc ngăn Việt Nam cho kong têa ki tơrŭm, kum ahdrối tung luât pơkâ tơpui kâ dêi Hàn Quốc a kơpong. Ing mâu hnoăng pêi ki kal hiăng châ pêi pro ƀă tơdroăng loi khât  tung la ngiâ ‘na tơrŭm cheăng pơla péa tơnêi têa, péa ngế kăn xiâm hiăng rơtế tơbleăng mơdêk râ tơrŭm cheăng pơla Việt Nam - Hàn Quốc xông tơ ƀrê “Tơrŭm cheăng tung tŭm tơdroăng’’, po môi troăng rôh vâ mơnhông mơdêk nếo ăm tơdroăng tơrŭm cheăng pơla péa tơnêi têa.

Peâ pâ môi tuăn mơdêk tơrŭm cheăng tê mơdró, ‘no liăn cheăng, tơrŭm mơnhông ƀă hnê cheăng ƀă kơmăi kơmok, veăng ‘no hnoăng mơnhông ƀă mơdêk cheăng  kâ, rêh ối hmâ ƀă tơdroăng nếo nôkố. Mơgêi hneăng hôp, péa ngế kăn xiâm hiăng tơbleăng tơdjuôm Việt Nam - Hàn Quốc ‘na tơrŭm cheăng tung tŭm tơdroăng vâ pêi tiô troăng tơrŭm loi nhoăm dêi rơpó khât pơla péa tơnêi têa ƀă tâi tâng tung kơpong rế ton rế trâu rơdâ, tơƀrê tâ nếo.