VOV4.Xơ Đăng - Kơxê lơ 1/8, a tíu pêi cheăng dêi Kăn xiâm hnê ngăn tơnêi têa pôa Nguyễn Xuân Phúc, Kăn xiâm hnê ngăn tơnêi têa hiăng tơpui tơno ƀă pôa Nikolas Dendias, Ngế xiâm tơpui kâ Greco drêng troh lăm pôu pêi cheăng a Việt Nam. Pôa Nguyễn Xuân Phúc hâk mơnê rôh lăm pôu ki apoăng dêi pôa Dendias a hnoăng cheăng pro Ngế xiâm tơpui kâ Greco; hlối loi khât hneăng lăm pôu veăng ‘no hnoăng ki kal  tung mơdêk tơrŭm cheăng tiah hmâ tơniăn lĕm pơla Việt Nam ƀă Greco.

Pôa Nguyễn Xuân Phúc, Kăn xiâm hnê ngăn tơnêi têa tơdah Ngế xiâm tơpui kâ kong têa Greco

Kăn xiâm hnê ngăn tơnêi têa tối mơnê kơ Greco hiăng veăng kum 50 rơpâu Euro ki Greco ‘măn ăm Vi ƀan Olympic Tơnêi têa Việt Nam ƀă 250 rơpâu klŏng vaccine hbrâ mơdât COVID-19 a mơ’nui hơnăm 2021. Kăn xiâm hnê ngăn tơnêi têa ăm ‘nâi Việt Nam đi đo rak vế mâu tơdroăng ki lĕm rơtế veăng kum ki kơnâ git dêi Greco ‘măn ăm Việt Nam tung tơdroăng tơplâ pro tơleăng lĕm  hdroâng mơngế, lâp tơnêi têa tơrŭm môi, xuân môi tiah tung tơdroăng mơjiâng ƀă mơnhông tơnêi têa nôkố.

Gương tơplôu ƀă tơbleăng