Kơxo lơ 22/12, a Tíu pêi cheăng dêi Kăn xiâm pơkuâ kong têa a pơlê kong kân Bogor, kong pơlê Tây Java, pôa Joko Widodo, Kăn xiâm pơkuâ kong têa pơkuâ leh tơdah khu râ kăn xiâm tơnêi têa kơ pôa Nguyễn Xuân Phúc, Kăn xiâm hnê ngăn tơnêi têa. Leh tơdah châ tơkŭm po kân krip, pôa Nguyễn Xuân Phúc, Kăn xiâm hnê ngăn tơnêi têa hôp tơpui ƀă pôa Joko Widodo, Kăn xiâm pơkuâ kong têa Indonesia.

A rôh hôp tơpui, pôa Nguyễn Xuân Phúc tối Việt Nam tơhrâ vâ môi tuăn ƀă Indonesia pêi klêi hnoăng cheăng pro Kăn xiâm hnê ngăn ASEAN hơnăm 2023 ƀă Indonesia vâ môi tuăn ƀă Việt Nam pêi klêi hnoăng cheăng chiâng tơnêi têa tung Hô̆i đong ngăn hnoăng rêh ối dêi khu lâp kong têa hneăng 2023 - 2025. Péa ngế Kăn xiâm vâ môi tuăn tah tơdroăng ki pro pá tung tê mơdró vâ châ tiô pơkâ péa pâ tâk 15 rơtal dollars hdrối hơnăm 2028, xuân môi tiah mơdêk hnoăng tơrŭm ‘na on tơhrik ki ‘mâi pro, on tơhrik rơkê ƀă pro hmốu patri ăm rơxế ô tô ki kơtâu ƀă on tơhrik.

Péa ngế kăn xiâm xuân hiăng tơbleăng tơdroăng péa tơnêi têa hiăng mơgêi 12 hơnăm hôp tơpui tơno ‘na klâ xoăng tíu tơkăng kong kơpong cheăng kâ ƀă vâ môi tuăn pơtối rak vế troăng rơhlâ dêi ASEAN ‘na tơdroăng Biển Đông.