VOV4.Xơ Đăng - Kơxê lơ 2/8, pôa Nguyễn Xuân Phúc, Kăn xiâm hnê ngăn tơnêi têa  pêi cheăng ƀă khu râ kăn pơkuâ kong pơlê Đồng Nai. Klêi kơ’nâi khu râ kăn pơkuâ mâu Khu xiâm, kơvâ cheăng tơpui tối, xông tơpui a roh pêi cheăng, pôa Nguyễn Xuân Phúc, Kăn xiâm hnê ngăn tơnêi têa tối rơdêi hnoăng dêi Đồng Nai ƀă tối tơdroăng pêi cheăng xúa kơmăi kơmok, tiô rơxông nếo tơnêi têa pin kô hrá tâng ôh tá ai hnoăng mơhnhôk djâ dêi Đồng Nai ƀă mâu kong pơlê tung kơpong cheăng kâ ki má môi peăng hdroh tơnêi têa.

Pôa Nguyễn Xuân Phúc, Kăn xiâm hnê ngăn tơnêi têa pêi cheăng ƀă kong pơlê Đồng Nai

Kăn xiâm hnê ngăn tơnêi têa pơkâ thế Đồng Nai kal ti tăng mâu tơdroăng mơhnhôk, troăng pêi tơtêk nếo, xua tâng pơtối kơnôm tiô tơdroăng tơtêk xêh dêi mâu tơdroăng ton, xua kô ôh tá tŭm vâ mơjiâng châ tơƀrê hôm ƀă djâ tơtêk Kơpong. Kong pơlê kal pêi pro tơdroăng cheăng kâ krê tung tơnêi têa ƀă tơdroăng cheăng kâ tơrŭm tro tíu, pro tơ’lêi hlâu tung tơdroăng châ mung liăn môi tiah Pơkâ dêi Đảng vâ mơjiâng xiâm kối mơnhông mơdêk.

Xua mê, Đồng Nai kal pơ’lêh nếo tung troăng tơmiât ƀă pêi pro, kal chiâng môi tơdroăng troh lâp lu mơnhông mơdêk ăm mâu kong pơlê achê môi tiah Bình Phước, Bình Thuận, Lâm Đồng teăng tơdroăng pơtối kơnôm to a pơlê kong kân Hồ Chí Minh.

A Sa Ly tơplôu ƀă tơbleăng